Група граѓански организации и поединци доставија официјално барање до Владата и МВР, за да се преиспита и укине одлуката со која се забранува движењето во шуми. Од работната група, составена од над 1.100 члена организации и физички лица, велат дека забраната бесправно ги спречува граѓаните на рекреативно движење. Станува збор за планинарски здруженија и љубители на природата кои бараат укинување на забраната за движење низ шумите и шумското земјиште кое стапи на сила пред неполна недела а важи се до нејзиното отповикување.
„Гледаме дека и во услови на полициски час, со важечката Забрана за движење во шуми, повторно се палат пожари и се врши дива сеча на дрва што само укажува на неефикасноста на мерката. Истовремено, апелираме институциите во рамките на своите ингеренции да ги насочите своите капацитети и своите ресурси и да ги вложат во напори за решавање на суштинските проблеми во земјава и вистинско зачувување на шумите и шумските предели од активности кои навистина ги загрозуваат“, реагираат од работната група.
Тие од Министерството за земјоделство, шумарство и водостопанство побараа да се укине забраната за движење по планините, со што ќе овозможи слободно движење во природните предели на државата, во шумите и на планините, на одговорни индивидуи чија единствена цел е зачувување на здравјето и уживањето во природа, се вели во барањето
Инаку МЗШВ пред една недела соопшти дека забраната се воведува поради зголемената опасност од појава на пожари на отворен простор и согласно законот луѓето кои ќе бидат затекнати како ја прекршуваат забраната да им се изрече глоба од 1.500 до 2.000 евра
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
