5ти Ноември е повеќе од датум, 5ти Ноември е посветеност, љубов, грижа, симбол за непоколебливиот и нескротливиот дух на нашата заедница.Пред 45 години токму околу големиот празник за дојранчани, 5ти Ноември и официјално е формиран клубот чие име се уште толку гордо звучи, а штом се спомене, асоцира на пријателство, на дружење, на славење заеднички победи и успеси.Формиран е клубот кој е гордост на секој жител на Дојран, прва љубов на секој фудбалер кој професионалните чекори во овој спорт ги направил токму за легендарниот фудбалски клуб – “Дојранско Езеро”.
“Дојранско Езеро” научи многу млади луѓе во минатото што значи да се биде дел од тим, да се биде тимски играч, фудбалер кој го остава срцето на терен за себе, за соиграчите, за клубот. Играч кој безусловно им се радува на победите, но и гордо ги прифаќа поразите. Истата функција клубот кој опстојува со децении ја има и денес. “Дојранско Езеро” е јадро на љубовта кон фудбалот како спорт, “Дојранско Езеро” е крвотокот на спортското движење во Дојран.
Во склоп на одбележување на празникот на општина Дојран, 5-ти Ноември, деновиве се здружуваме да се потсетиме на важноста, не само на фудбалскиот клуб, туку и на поединците кои ги вложиле своите срца и души, дел од своето битие, за клубот да стане она што е денес. Плакети за благодарност и признанија се доделуваат на нашите извонредни играчи, оние кои со гордост ги носеа нашите бои и даваа се од себе на теренот.
Но, подеднакво е важно да се потсетиме и на оние кои оставија неизбришлива трага во “Дојранско Езеро”, иако веќе не се меѓу нас. Денес се потсетуваме на лекциите кои ги научивме и на големите успеси на нашите фудбалери кои воедно беа и наши роднини, пријатели, идоли… Постхумно им оддаваме почит на големите играчи, наши дојранчани, кои во минатото најмногу придонеле за развојот на “Дојранско Езеро”. Нивното наследство вечно ќе живее, а ние со задоволство ќе ја исполнуваме должноста која ни ја оставија – клубот да опстојува, да се создаваат нови генерации фудбалери и фудбалот како спорт во Дојран никогаш да не згасне.
Ви благодариме, на сите вас кои бевте дел од ова неверојатно патување, огромна благодарност и на оние што се и ќе бидат дел од најубавата фудбалска приказна – “Дојранско Езеро”. Заедно да ги направиме следните 45 години уште повпечатливи, поемотивни и поубави од минатите години.
Да живее “Дојранско Езеро”!
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
