За време на коронавирусот, голем број физички и правни лица во рамките на своите можности донираат средства и опрема на струмичката болница која ќе биде искористена за превенција и спречување на ширењето на вирусот КОВИД-19. Меѓу донаторите, како што дознаваме е и струмичкиот фудбалски интернационалец и капитен на македонската фудбалска репрезентација Горан Пандев. Веста ни ја потврди и директорот на струмичката болница Наќе Гогов кој подвлече дека, парите уплатени на сметката на болницата од страна на Пандев ќе бидат искористени за набавка на заштитна опрема за медицинскиот персонал кој е директно изложен на зараза од вирусот.
,, Точно дека деновиве донираше и Горан Пандев. Неблагодарно е да споменувам износи, но би сакал да упатам благодарност како до него така и до останатите правни и физички лица. Парите ќе бидат искористени за набавка на скафандери, заштитни маски, ракавици според стандардите на СЗО за да бидат заштитени здравствените работници кои се на првата ,, борбена’’ линија и најмногу се изложени на ризикот да бидат заразени. Тоа се лица кои треба да спасат нечиј човечки живот и затоа треба да бидат соодветно заштитени,, ни изјави директорот на струмичкта болница Наќе Гогов.
Горан Пандев пред извесен период заедно со своите колеги репрезентативци и стручниот штаб на македонската сениорска фудбалската селекција, донираа средства за Фондот за здравствено осигурување за помош на здравствените работници во справување со коронавирусот. Тој деновиве на својот официјален инстаграм профил објави фотографија како вежба во домашни услови и апелираше до своите сограѓани да ги следат владините препораки и да седат дома се со цел заеднички да се избориме против коронавирусот кој предизвика глобална пандемија..
Деновиве средства донираше и фудбалскиот репрезентативец Тихо Костадинов кој потекнува од Миравци а својата донација ја насочи за гевгелиската болница од каде изразија огромна благодарност.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
