Академија Пандев, дебитантскиот настап во Лигата на Европа ќе го има во Скопје на стадионот ,,Тодор Проески’’ а не ,,Младост’’ во Струмица како што беше првично планирано. Како што дознаваме, УЕФА со допис ја известила ФФМ но и струмичкиот клуб дека заради ограниченото време не се во можност да извршат инспекциски надзор на стадионот во Струмица за да дадат виза за одигрување на првото квалификациско коло од Лигата на Европа.
Управата на ФК Академија Пандев ги приложиле аргументите дека ,,Младост“ досега бил домаќин на европски мечеви и дека овој стадион ги исполнува условите но од УЕФА биле децидни – Академија Пандев како домаќин да игра во Скопје на националната арена ,,Тодор Проески’’ каде се играле последните мечеви на македонската фудбалска репрезентација.
Деновиве ќе биде познат противникот на Академија Пандев во првото квалификациско коло. Имајки во предвид дека дебитираат на европската сцена а согласно УЕФА коефициентот, струмичани се неносители односно аутсајдери пред ждрепката за првото квалификациско коло. Можни противници на ,,пандевци’’ се големи имиња како што се Легија Варшава, Малме, сплитски Хајдук, Глазгов Ренџерс, Видеотон, АЕК Ларнака и многу други кои имаат огромно искуство на европската фудбалска сцена
Првите натпревари од првото квалификациско коло за Лигата на Европа се играат на 11. јули, а реваншите се на 18. јули. На ждрепката ќе се дознае каде ќе се игра првиот меч а каде реваншот.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
