Територијалната противпожарна единица во Гевгелија целосно е подготвена за дејствување и заштита од пожари, во пресрет на летната сезона, соопштуваат надлежните од Општина Гевгелија.Поради претстојните зголемени летни температури, тие апелираат до граѓаните да внимаваат при посетите во шумите и во другите пошумени или необраснати локации, да не користат запаливи материи, кои може да предизвикаат пожар од пошироки размери.
,,Се предупредуваат патниците што патуваат со автомобилски или железнички превоз да не фрлаат догорчиња или неизгаснати цигари преку прозорците, за да не се предизвикаат пожари по должината на патните комуникации. Лицата што во периодот на зголемени надворешни температури мора да спроведуваат работни активности во пошумени или други локации, особено при палење стрништа, да ги зголемат мерките на претпазливост за да не дојде до опожарување на околината – предупредуваат од локалната самоуправа.
Од територијалната противпожарна единица, пак, ги известуваат граѓаните доколку забележат одредени сомнителни места на кои е присутен оган или чад, веднаш да ги известат надлежните служби во најблиските институции и установи или да се јават на телефонскиот број 193. или 034/211-881.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
