Вкупно 21 улица планира да асфалтира Општина Василево за што деновиве склучи договор со струмичката фирма ,,Пешо Инженеринг’’ која во конкуренција на седум фирми достави најниска понуда по распишаниот тендер од страна на општинските власти. Договорот тежи околу 8 милиони и 480 илјади денари или или околу 138 илјади евра, средства со кои се планира, речиси во сите населени места од општината да се асфалтираат улици, согласно годинашнава општинска програма за изградба на локални патишта и улици.
Според информациите, планирани се 4 улици во општинскиот центар Василево во вкупна должина од 419 метри. 4 улици се планирани и во Дукатино каде ќе се асфалтираат вкупно 305 метри. Во населените места Пиперево, Ангелци, Чанаклија и Радичево се планираат да се асфалтираат по две улици додека во населените места Седларци, Нова Маала, Едрениково, Сушево и Добрашинци по една улица. Како што најави градоначалникот Марјан Јанев би требало да бидат асфалтирани околу 2650 метри, улици кои од страна на месното население се ставени како приоритетни.
Според склучениот договор, Пешо Инженеринг треба да отпочне со асфалтирање на улиците од кога ќе биде воведен во работа а плакањето ќе биде во рок од 90 дена по реализација на секоја ситуација на терен. Средствата за реализација на овие улици се планирани од Буџетот на општината.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
