Општина Струмица ја објави листата на основци и средношколци кои ќе добиваат стипендии во времетраење од 9 месеци во висина од 2000 и 2500 денари. Станува збор за стипеднии од Општина Струмица и Фондацијата ,,Нова Генерација“ за кои имаше објавено Јавен повик а наменети за сите ученици кои во текот на претходната учебна година имаат освоена прва, втора или трета награда на меѓународен, државен, регионален или општински натпревар.
Како што е објавено, доделени се вкупно 41 стипендија за ученици од основните училишта од кои 28 доделува Општина Струмица додека 13 Фондацијата Нова Генерација. Овие ученици ќе добиваат по 2000 денари. По 2500 денари девет месеци ќе добиваат вкупно 33 средношколци од кои 23 ќе бидат стипендии од Општината додека 10 од Фондацијата.
На почетокот на декември минатата година градоначалникот на Струмица Петар Јанков објави дека е потпишан Меморандум за соработка со Фондација „Нова Генерација“, претставена од Билјана Серафимовска и Васко Атанасов двајцата истакнати спортски работници .Серафимова во спортското качување Атанасов како кошаркарски тренер.
,,Со овој чекор започнуваме ново партнерство чија главна цел е поддршка на младите од нашиот град. Предмет на овој Меморандум со Фондација Нова Генерација е давање меѓусебна поддршка, помош и соработка при реализирање на активности кои се од заеднички и општ интерес. Заедно со Меморандумот пристигна и првиот Договор за соработка. Обезбедуваме дополнителна поддршка на редовни ученици од основните и средни училишта во нашата Струмица.“, објави градоначалникот Јанков
Решенијата за добивање на стипендиите ќе им бидат врачени на учениците на посебен настан, соопштија од Општината. ( В.Трајков )
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
