Општина Василево преку Министерството за животна средина и просторно планирање обезбеди контејнери за отпад, кои ЈПКД Турија ќе ги вклучи во системот на организирано собирање на смет. Според информацијата од ЈПКД „Турија“, се работи за вкупно 19 контејнери од 1100 литри и ќе бидат поставени на јавните површини на локации за кои се покажало дека има најголема потреба како и во индустриската зона во Василево.
Од ЈПКД „Турија“, Василево апелираат до граѓаните на разумно користење на контејнерите односно во истите да не фрлаат тешки предмети и запаливи материјали, особено пепел поради можноста од остатоци од жар кои би ги опожариле контејнерите кои се изработени од пластика.
Информацијата за новообезбедените контејнери, jа сподели и градоначалникот на општина Василево Славе Андонов, кој посебно нагласи дека грижата за животната средина е обврска на сите граѓани.
„Општина Василево доби контејнери, кои ќе бидат распоредени на соодветни локации низ населените места. Со цел подобрување на системот за собирање на отпадот, добивме контејнери преку Министерството за животна средина и просторно планирање. Контејнерите ќе бидат поставени низ населените места на соодветни локации. Грижата за животната средина е наша обврска“, објави градоначалникот Андонов
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
