Не е точно дека новиот водовод во Тетово носи повеќе штета, отколку корист

594

Градоначалникот на Општина Тетово, Биљал Касами, пред медиумите даде невистината изјава во која вели дека проектот за Лешнички водовод е катастрофален и носи повеќе штета, отколку корист.

Ми приложија од ЈКП дека се осум проблематични точки на целиот довод на цевката од Лешница до пречистителната станица. На една од тие точки пред месец дена интервениравме, но за другите немаше време, затоа што започна зимата. Една од тие точки е пукната и сега вработените во ова време се наоѓаат на лице место и се обидуваат да ја санираат и се надеваме дека за два до три дена ќе биде завршена таа работа, а напролет ние ќе излеземе со целосна студија, каде се тие точки и ќе интервенираме да ги санираме следната година. Тој проект за Лешнички водовод е катастрофален како и сите други проекти, кои нецелосно се проектирани и реализирани. Затоа ние сега се соочуваме со проекти, за кои се потрошени милионски суми од даноците на граѓаните. Сега повеќе прават штета отколку што се од корист, рече Касами.

[Извор: Тетово Инфо, датум: 21.12.2021]

ОБРАЗЛОЖЕНИЕ:

Градоначалникот Биљал Касами оваа изјава ја даде при посетата на градежните активности за санација на дупките на улицата „Браќа Миладоновци“ во Тетово, откако медиумските екипи го прашаа, дали се планира да се преземат превентивни мерки за да нема дефекти на новиот водовод, поради кои во неколку наврати има рестрикции во водоснабдувањето.

Не е вистина дека новиот водоснабдителен систем на градот носи повеќе штета отколку корист. Со новиот водовод градот доби дополнителни 200 литри вода во секунда. Додека, пак, само со стариот систем за водоснабдување и вклучените бунари, граѓаните имаат едвај 200 литри во секунда кои, според проценките на ЈКП Тетово, не се доволни да се задоволат потребите на граѓаните.

Работници на ЈКП Тетово работат на отстранување на дефект на новиот водовод Фото: Официјалната ФБ страница на ЈКП Тетово

Кај новиот водовод навистина се случија неколку дефекти. Сепак, за време на остранувањето на секој дефект, тетовци имаа рестрикции на вода не повеќе од десетина дена. А, доколу не би постоел новиот водовод, според искуството на тетовчани од минатото, рестрикциите би биле во текот на целата година, особено во горниот дел од градот. Така што, новиот водовод и покрај тоа што се случуваат повремени дефекти, во никој случај не носи повеќе штета од корист.

Касами во изјавата, исто така, вели дека соочува и со други проекти од преходната локална власт кои носат повеќе штета од корист, ама не прецизира точно на кои проекти мисли.

Претходната локална самоуправа на чело со Теута Арифи која го водеше Тетово 8 години, реализираше неколку проекти. И покрај пропустите во дел од нив, сепак тие се многу важни за граѓаните. За ниту еден од нив не може да се каже дека има направена повеќе штета од корист.

Тука ќе наведеме неколку од тие проекти:

  • Обнова и проширување на патот кон рекреативното место Бањиче, како и пешачка патека долж патот. Со овој проект тетовци добија една од ретките рекративни зони во Тетово во ниските предели на Шар Планина, каде граѓаните можат да се рекреираат, релаксираат и да бидат подалеку од градската врева.
  • Изградба на резервоар за вода за пиење во село Лисец, и населбата Сончев брег.
  • Нови 150 контејнери за отпад, како и 4 нови камиони за собирање отпад, 1 чистач и 1 воздушна метла, за потребите на ЈПК „Тетово“.Со контејнерите и новата механизација се зголеми капацитетит за собирање и транспорт на сметот.
  • За првпат е воведено зонско паркирање на булеварите „Маршал Тито“ и „Илинденска“,  кои спаѓаат во зона А, а зонското паркирање се прошири и во зона Б на неколку улици во градот

Зоран Андонов новинар со повеќе децениско искуство кој сега работи како дописник од Тетово, вели дека ваквите изјави не се карактеристични само за сегашниот градоначалник Касами и дека истото го говорат речиси сите нови градоначалници, посебно ако нивниот  претходник бил од противничкиот табор.
За тоа дали нивните претходници работеле лошо, според Андонов,  треба да се утврди со валидни докази, а не со паушални изјави.

Изградбата на цевководот за кој зборуваше градоначалникот Касами не е од времето на Теута Арифи. Него прв почна да го гради нејзиниот претходник Сади Беџети. И Арифи кога ја презеде градоначалничката функција исто така жестоко го критикуваше Беџети за проектот за цевководот којшто тогаш се градеше, нагласувајќи дека има многу пропусти во градбата и за кој биле потрошени големи пари. Таа направи и ревизија на истиот и успеа да го доизгради со што Тетово доби нови од 150 до 200 литри вода во секунда токму во најкритичните месеци. Ако говориме реално, со овој цевковод се подобри состојбата со водоснабдувањето во градот,  ни рече Андонов.

Притоа додава дека актуелниот градоначалник на Тетово, Касами сега со истата реторика, како таа на Теута Арифи, ја критикува изградбата на цевководот.

И тој најавува дека напролет ќе направи негова ревизија и ќе ги отстранува неговите недостатоци, а тоа секако повторно е сврзано со нови давачки. Сето ова се однесува и на поправката на градските улици, решавањето на сообраќајниот хаос во градот и на ред други комунални проблеми, вели Андонов.

Зоран Андонов    Фото: Вистиномер

Имајќи го сето ова предвид изјавата на градоначалникот Касами, дека новиот водоснабдителен систем на градот носи повеќе штета отколку корист, ја оценуваме како невистина.

ИЗВОРИ:

Оцени: Зоран Димовски

Овој напис е изработен во рамките проектот Проверка на фактите за напредокот на Северна Македонија кон ЕУ, имплементиран од Фондацијата Метаморфозис. Написот, кој е првично објавен во Вистиномер, e овозможен со поддршка на американската непрофитна фондација NED (National Endowment for Democracy). Содржината на написот е одговорност на авторот и не секогаш ги одразува ставовите на Метаморфозис, НЕД или нивните партнери.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.

ПОВРЗАНИ СТАТИИПОВЕЌЕ ОД АВТОРОТ