Рецензираме пост на Фејсбук во кој се тврди дека невакцинираните не се опасни во контекст на тоа дека не го шират вирусот (новите варијанти на вирусот, а од нив најдоминантна на светско ниво е делта варијантата). Во постот се додава дека невакцинираните не го шират вирусот, па затоа се предлага тие (вакцинираните) да се изолираат од општеството. Нелогичното тврдење му е атрибуирано на професор по инфективни болести од Франција, Кристијан Пероне.
Вакцинираните се во ризик од новиот вирус и го пренесуваат. Докажано е во различни земји. Значи вакцинираните треба да бидат изолирани од општеството. А невакцинираните не се опасни. Вакцинираните се опасни. Докажано е во Израел, тешките случаи во болниците се од вакцинирани луѓе. Во Британија исто каде што имаат голема вакцинална програма, имаат проблеми”, вели професорот во своето видео излагање.
Но, на 31 јули, Центарот за контрола и превенција на болести, истакна дека делта варијантата на коронавирусот е исто толку заразна, како и сипаниците и дека инфекциите кај вакцинираните може да се исто толку преносливи, како и кај невакцинираните. Од ова не произлегува дека вакцинираните се поопасни, туку дека и едните и другите можат да го пренесуваат вирусот!
Според Гласот на Америка, внатрешни документи на Центарот за контрола и превенција на болести, најнапред објавени од „Вашингтон Пост“, покажуваат дека ,,војната (против ковид-19 – н.з.) се менува поради делта варијантата”.
Агенцијата, исто така, потенцира дека вакцините се високоефективни во превенција на инфекции, сериозна болест и смрт. Центарот за контрола и превенција на болести посочува дека иако вакцинираните се во помал ризик да се разболат, сепак, можат да го пренесуваат коронавирусот на другите, на ист начин како и невакцинираните. Значи, не е така како што се тврди во постот кој го рецензираме, туку ризик да бидат преносители постои и кај вакцинираните и кај невакцинираните.
Што друго кажува Центарот за контрола и превенција на болести, што е дијаметрално спротивно на она што е изнесено во постот кој го рецензираме? Во поглед на клиничката слика, исто така, не е точно тоа што се тврди во постот, дека вакцинираните се потешко болни од невакцинираните!
Прво, ЦДЦ е дециден дека делта варијантата предизвикува потешка болест кај невакцинираните. Во две различни студии од Канада и Шкотска невакцинираните пациенти инфицирани со делта варијантата на коронавирусот имале поголема веројатност да завршат во болница, отколку пациентите инфицирани со алфа варијантата.
Освен тоа, според Центарот за контрола и превенција на болести, т.е. според најновата информација објавена од институцијата на 19 август годинава, невакцинираните луѓе остануваат најголема грижа! Тие што примиле две дози, а се заразиле со ковид 19, односно случаите каде што има пробивање на имунитетот, се многу поретки отколку инфекциите кај невакцинираните.
Центарот за контрола и превенција, продолжува да следи дали целосно вакцинираните со асимптоматска инфекција, може да го пренесуваат вирусот. Сепак, најголемиот ризик за трансмисија е меѓу НЕВАКЦИНИРАНИТЕ ЛУЃЕ, кои е поверојатно да дојдат во контакт и да го пренесат вирусот. Целосно вакцинираните заразени со делта варијантата може да го пренесат вирусот на другите. Сепак, вакцинираните луѓе се инфективни пократок временски период. Што значи дека тие со 2 дози вакцина, се инфективни пократко време отколку невакцинираните, велат од Центарот за контрола и превенција на болести во своите најнови информации.
Вакцините го намалуваат ризикот лице да се зарази со вирусот кој го предизвикува ковид 19, како и делта варијантата. И целосно вакцинираните може да се инфицираат и да се разболеат, ама вакцината за нив е силна заштита против сериозна болест и смрт.
И македонската пракса оди контра тврдењето изнесено во постот кој го рецензираме.
Пациентите кои се хоспитализирани и целосно вакцинирани, според инфектолозите, се со полесна клиничка слика за разлика од оние што се невакцинирани. Вакцинираните хоспитализирани пациенти имаат други хронични заболувања, имале посериозни болести во минатото или операции и имаат потреба од надзор од стручни лица. Околу 10 отсто од сите хоспитализирани во државата се вакцинирани, велат од Министерството за здравство.
Директорката на Инфективната клиника, доктор Милена Стевановиќ, вели дека пациентите во болница со 2 дози вакцина имаат полесна клиничка слика од невакцинираните.
Вакцината нема целосно да не заштити да не се заразиме со вирусот, но целосно вакцинираните ќе поминат полесно и тоа ни се потврдува секојдневно следејќи ги пациентите, вели таа за 360 Степени.
Од хоспитализираните во земјава, најголем дел се невакцинирани!
Од Министерството за здравство за „Вистиномер“ велат дека од 6-19 август 2021 г. на територија на државата 9.881 граѓанин се позитивни од тестирани на ковид-19, а од нив само 15 проценти биле целосно вакцинирани, односно 1.507 лица. Голем е бројот на невакцинирани граѓани кои се заразиле со ковид-19. Според двонеделната статистика, 8.374 граѓани од позитивните на ковид-19 не биле вакцинирани.
Процентот на хоспитализирани лица, кои се невакцинирани, изнесува 91 процент, додека само 9 проценти од сите 724 моментално хоспитализирани пациенти се целосно вакцинирани. Смртноста кај невакцинираните е драстично поголема, покажува анализата. Во период од две седмици на територијата на државата починало 101 лице со ковид-19, 92 пациенти од починатите не биле вакцинирани, а само 9 односно (8 проценти) примиле вакцина. Според анализите, починатите имале повеќе хронични заболувања. Заразените и починатите се вакцинирани со вакцини што ги има на располагање кај нас, како и со вакцини Модерна и Џонсон и Џонсон, кои некои од пациентите ги примиле во странство, ни рекоа од МЗ.
Ниедна официјална институција, медицинска агенција никаде во светот не тврди дека вакцинираните треба да се одделат од општеството зашто се во поголем ризик од варијантите, ниту, пак, тврди дека невакцинираните не се во ризик од тоа да бидат инфциирани или да бидат преносители! Поради тоа постот го оценуваме како дезинформација.
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
