Вистиономер праша во Министерството за одбрана дали е точно дека министерката Петровска подготвува список за мобилизација на војници во Украина, како што тврди постот, оттаму ги демантираа ваквите информации. „Неточно е тврдењето дека Министерството за одбрана или министерката подготвуваат списоци за мобилизација“, велат од МО. Министерката за одбрана досега во неколку наврати изјави дека Македонија ќе праќа воена опрема како помош за Украина, но дека нема да испрати војници
Пост на Фејсбук тврди дека министерката за одбрана, Славјанка Петровска прави список за мобилизација на војници за војната во Украина. Ова не е точно.
Славјанка веќе го прелистува списокот на ДИК за излезеност на референдумот и подвлекува кандидати за мобилизација. Исто како за референдумот и сега би требало сите оние јавни личности што повикуваа да се гласа за ” ЕВРОПСКА СЕВЕРНА ВУКО***ИНА”, да бидат мобилизирани и пратени во први борбени редови во Украина, се вели во објавата што ја анализираме.
Министерката за одбрана досега во неколку наврати изјави дека Македонија ќе праќа воена опрема како помош за Украина, но дека нема да испрати војници.
И од НАТО Алијансата досега неколкупати потенцираа дека НАТО нема да стане страна во војната, дека тоа е војна меѓу Русија и Украина, а НАТО ќе ја поддржува Украина во нејзината намера за одбрана на територијалниот интегритет.
Генералниот секретар на НАТО, Јенс Столтенберг во мај годинава на светскиот економски форум во Давос рече дека НАТО нема да испрати свои војници во Украина бидејќи сака да избегне војна со Русија.
Главната одговорност на НАТО е да ги заштити сите свои сојузници и да направи се за да спречи ескалација на оваа војна. Не сакаме да предизвикаме конфликт, туку да го спречиме и да го зачуваме мирот, рече Столтенберг.
Истиот став го повтори и Американската амбасадорка при НАТО, Џулиен Смит на 11 октомври.
Сојузниците се јасни, генералниот секретар е јасен, обединет е ставот дека НАТО не треба да стане страна во овој конфликт, ова е конфликт меѓу Украина и Русија, НАТО е дефанзивен воен сојуз, а Украина има целосно право да ја брани својата територија, рече Смит.
Вистиономер се обрати до Министерството за одбрана каде прашавме, дали е точно дека министерката Петровска подготвува список за мобилизација на војници во Украина, како што тврди постот. Оттаму ги демантираа ваквите информации.
Учеството на државјани од Северна Македонија во странска војска е кривично дело. Армијата на Република Северна Македонија учествува единствено во НАТО и ЕУ мисии и вежби. Неточно е тврдењето дека Министерството за одбрана или министерката подготвуваат списоци за мобилизација. Согласно безбедносните проценки, ситуацијата во земјата е безбедна и стабилна. Министерството за одбрана и министерката Петровска повикуваат на воздржување од ширење на лажни вести и дезинформации, ни одговорија од МО.
Според сето погоре изнесено, можеме да заклучиме дека постот кој го анализираме е невистинит.
Овој напис е изработен во рамките проектот Промовирање на пристап до веродостојни вести за борба против дезинформации, имплементиран од Фондацијата Метаморфозис. Написот, кој е првично објавен во Вистиномер, e овозможен со поддршка на американската непрофитна фондација NED (National Endowment for Democracy). Содржината на написот е одговорност на авторот и не секогаш ги одразува ставовите на Метаморфозис, НЕД или нивните партнери.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
