Државата сеуште нема јасна слика во каква кондиција е македонскиот аграр. Официјални податоци кој, што одгледува или произведува, колку ниви се обработуваат, каква механизација се користи, каква е структурата и работната сила ангажирана во земјоделските стопанства – нема. Податоците се црпат исклучиво од апликациите за субвенции кои не се доволно да се креираат одредени стратегии велаат експертите кои тврдат дека треба да се реализира земјоделскиот попис.
Пописот на земјоделството во земјава требаше да се реализира минатата година , откако во 2022 година имаше пробен попис. Од Државниот завод за статистика тогаш соопштија дека пробниот земјоделски попис е со цел да се тестира методологијата и прашалниците за спроведување на Пописот, како и организациските и стручните аспекти на оваа операција. Покрај во Струмица, пробниот попис беше спроведен кај земјоделски семејства и деловни субјекти во општините Илинден, Куманово, Тетово, Кавадарци, Кривогаштани и Чешиново-Облешево. Земјоделскиот попис требаше да се спроведе од 1 до 31 март 2024 години, но заради Парламентарните и Претседателските избори, целата операција е одложена.
„За реализација на земјоделскиот попис во нашава земја се очекуваат измените на Законот за Попис на земјоделството. Со новиот предлог-закон ќе се утврдат роковите, целите, и кои податоци ќе се прибираат. Нашите очекувања се дека оваа статистичка операција ќе се реализира идната година, со оглед дека сме задолжени од Еуростат да го извршиме земјоделскиот попис“, ни одговорија од Државен завод за статистика.
Со земјоделскиот попис до сега требаше да добие јасен преглед на тоа колку регистрирани, а колку евидентирани земјоделски стопанства има во земјава, но и степенот на искористеност на земјоделското земјиште, дали тоа стои како угари или се обработува. Паралелно, земјоделскиот попис треба да даде и јасна слика каква е работната сила што управува со семејното земјоделско стопанство или деловниот субјект, за користеното земјоделско земјиште, како и други прецизни податоци, како и колку се наводнуваат и ѓубрат нивите, имаат ли добиток, каква механизација и опрема користат, дали имаат користено мерки за рурален развој.
Според податоците од Државниот завод за статистика од 2021 година, во земјава како земјоделско земјиште се водат околу 1.260.000 хектари. Како обработлива површина се водат околу 517 илјади хектари. Ако се спореди оваа бројка со онаа од пред 30 години – 660 илјади хектари, излегува дека обработливите површини во Македонија се намалени за околу 22%. (В.Трајков)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
