На престојните локални избори во Струмица, Радовиш, Гевгелија ќе има независни кандидати за градоначалник а независни листи за советници ќе има во Струмица, Босилово и Ново Село. Вака информираа за Дрнка.МК портал од канцелариите на ДИК во Југоистокот откако на полноќ заврши рокот за собирање потписи за независни кандидатури за локалните избори закажани на 19 октомври.
Во Струмица Драган Котуровиќ ги собрал потребните потписи за независен кандидат за градоначалник . Во Радовиш Страхил Гавритов сегашниот претседател на Советот на Општина Радовиш додека во Гевгелија како независен кандидат кој ги има собрано потребните потписи е Магдалена Каркалашева екс директорка на училиштето Крсте Мисирков.
Што се однесува до независните советничките листи, нив ќе ги има во Струмица, Ново Село и Босилово. Граѓанската платформа против изградба на рудници ,,Стига е“ што произлезе од ,,Здрава котлина “ како и на претходните локални избори, ќе има свои листи во општините Струмица, Ново Село и Босилово. Во Струмица листата ќе ја предводи Ѓорги Танушев, во Босилово Стојан Велков Трн а во Ново Село Костадин Ристоманов. Независна листа за членови на Советот има доставено и Давид Златанов еко активист од иницијативата Ја штитам Беласица.
Рокот за поднесување листи за кандидати за градоначалници и за советници за локалните избори е до 13 септември. До 11 септември, пак, е рокот за увид во Избирачкиот список во сите подрачни канцеларии и одделенија на Државната изборна комисија (ДИК). Исто така во тек е и пријавувањето за набљудување и известување од изборите. (В.Трајков)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
