Пред извесен период од печат излезе монографијата „50 години Распеани Валандовчани“ (нов музички состав) од авторката Станка Бајлозова-Барламова. Станува збор за дело во кое авторката го опфаќа периодот на работа на новиот состав на музичкиот ансамбл во чест на прославувањето на педесетгодишнината од постоењето на „Распеани Валандовчани“. Станува збор за музички ансамбл за староградска, народна и новокомпонирана музика кој е основан и опстојува од 1973 година
На оваа монографија авторката започна да работи кон крајот на 2021 година. Беше потребен временски период од околу две години за да се изработи и отпечати во финална форма. Забележувањето на фактите и информациите во подрачјата на локалните културни истории е многу битно и значајно бидејќи токму тоа се нишките кои помагаат во градењето на нашата заедничка национална историја.
,, Оваа монографија го опфаќа периодот на работа на новиот состав на музичкиот ансамбл. Овој музички ансамбл има долгогодишна музичка традиција и изобилува со богата архива на активности, заложби и достигнувања. Затоа мојата работа ја засновав врз тоа да изработам два тома. Книгата која што оваа година излезе од печат е посветена на новиот музички состав на ансамблот кој е активен од 2003 година, а во текот на моето понатамошно работење ќе изработам уште еден дел кој што ќе биде посветен на стариот музички состав на ансамблот кој бил активен од 1973 до почетокот на деведесеттите години на минатиот век. На тој начин валандовската културна историја ќе биде збогатена со уште две книги кои си се комплементираат една со друга и прават и создаваат комплетна целина,, вели авторката Станка Бајлозова-Барламова
Музичкиот ансмбл „Распеани валандовчани“ долги години ја негува валандовската тадиција и неизбежно станува вредност која што ќе биде забележана во локалната историја. Ако Фолк-фест, Валандово е најголемиот културен идентитет на градот и општината, по него во почетните скалила на валандовската културна хиерархија се наоѓа и овој музички ансамбл заедно со уште неколку други поголеми културни идентитети кои што постојано низ текот на годините испишуваат историја.
,,Изработката на оваа книга за мене претставуваше истовремено и сатисфакција и предизвик. Големо е задоволството да се изработи нешто кое што му го оставаш на својот роден град како подарок со безвременски рок на траење. Културата е доста специфична област и едноставно мораме да работиме кон тоа да ги поттикнуваме и зголемуваме културните вредности на нашето родно тло. Постојано тврдам дека Валандово е мало место кое што може да се носи со голема културна работа. Повеќе од нужно е да работиме кон тоа да ја поттикнеме динамичноста на културната работа и во малите места бидејќи централизацијата на работите води кон тоа можностите да им се достапни единствено на одредени групи луѓе,, вели Станка Бајлозова-Барламова
Промоцијата на монографијата „50 години распеани валандовчани“ (нов музички состав), планирана е да се случи наредниот период во Домот на културата „25 Мај“ во Валандово. Инаку Станка Бајлозова-Барламова е родена 6.2.1993 година. Дипломирала на Филолошкиот факултет „Блаже Конески“ во Скопје при катедрата за македонска книжевност и јужнословенски книжевности. До сега ги има објавено книгите „Студентски портрет“ (огледи, 2017), „Силуети“ (раскази, 2021), „50 години распеани валандовчани“ (2023, монографија). Работи во Домот на културата „25 Мај“ во Валандово во областа на литературната дејност. Организатор е и реализатор е на работилници и голем број културни настани.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
