Општина Босилово и годинава ја реализираше еко акцијата ,,Овошно дрвце за пластични шишиња“ . Станува збор за акција каде жителите на општината ги собираат пластичните шишиња од своите домови и ги носат на однапред утврдените локации и за возврат добиваат овошен садник, цреша, праска, круша, слива. За 30 пластични шишиња Општина Босилово им доделуваше по еден овошен садник по нивен избор. Околу 1000 домаќинства од населените места во општината донесоа пластични шишиња.
,, Ова е четврта година како што ја реализираме ова еко акција која има за цел едукација и подигнување на свеста за селекција на отпадот крај граѓаните а пред се младите а од друга страна секое домакинство добива овошно дрвце. Досега имаме доделено околу 6 000 садници праски, вишни, цреши и се надевам дека дел веќе даваат плодови“, вели градоначалникот на Босилово Ристо Манчев според кого веќе се менуваат навиките кај жителите за пластичниот отпад но проблем е што понатаму со собраната пластика.
Годинава како што подвлече градоначалникот Манчев доделени се околу 1 500 садници. Граѓаните донеле околу 1 200 килограми пластични шишиња. Инаку дрвцата општина Босилово ги набавува со планираните средства за репрезентативен матријал за Нова година. место да набавува пенкала, тефетери, запалки, календари таа набавува садници кои потоа ги дели на граѓаните за пластични шишиња. (В.Трајков)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
