Вкупно 18.149 апликации на студенти се прифатени во рамки на првиот рок за аплицирање на повикот за субвенциониран студентски оброк, соопшти Министерството за образование и наука.
Во првиот повик кој беше отворен за студентите од втора и повисоките години на студии пристигнале вкупно 21.693 апликации. Апликациите биле разгледани од страна на надлежната комисија која прифатила над 83 отсто од поднесените апликации.
Како што информираат од МОН, на сите кандидати решението им е испратено на електронската адреса која ја имаат наведено при поднесувањето на апликацијата, а истото може да се најде и во самата апликација на порталот https://e-uslugi.mon.gov.mk/, во менито „Mои апликации“.
За било какви прашања и дополнителни информации студентите можат да се обратат на следните електронски адреси на вработените во Министерството: qenan.sali@mon.gov.mk; nese.mustafa@mon.gov.mk и rahime.memedi@mon.gov.mk.
Рокот за пријавување за субвенциониран студентски оброк за новите студенти и оние кои не успеале да го остварат своето право додека траеше првиот рок за аплицирање, започнува на 1 октомври и ќе трае до крајот на месецот.
„Начинот на аплицирање е дигитализиран, односно пријавувањето се спроведува исклучиво електронски преку порталот https://e-uslugi.mon.gov.mk/ и многу едноставно, со прикачување на само два документи – пријава и изјава за точност на податоци и се наведуваат податоци за лична трансакциска сметка“, велат од МОН.
Со мерката субвенциониран студентски оброк, студентите за време на своите студии ќе добиваат по 2.400 денари месечно во текот на 9 месеци во годината, средства кои ќе бидат наменети за купување на здрави оброци.
Во јули годинава МОН соопшти дека очекува мерката да ги следува околу 40.000 студенти кои студираат на државните и приватните универзитети во земјава.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
