Министерот за земјоделство, шумарство и водостопанство Љупчо Николовски очекува за минимум 20-тина отсто да се зголемат откупните цени за тутунот и да достигнат до 400 денари за килограм тутун прва класа при што најави и нови мерки за тутунарите.
,,Водиме голема грижа во поглед на поддршката на тутунопроизводителите. Го променивме моделот на проценување, повеќе се цени првата класа со што годишно добиваат пет милиони повеќе заради новиот модел. Подготвуваме нови мерки кои ќе ги соопштиме со носењето на годишните програми, рече Николовски во одговор на новинарско прашање во Штип.
Нагласи дека веќе имале средби со откупните компании и додаде дека очекуваат за минимум 20 проценти да биде зголемена откупната цена на тутунот за годинава. Некои од откупните компании, како што кажа, веќе и го најавиле тоа.
Посочи дека веќе е подготвен теренот за тоа и се направени сите проверки од Државниот инспекторат за земјоделство, но има и потврда од сите откупни компании дека се подготвени за почетокот на откупот и имаат обезбедено средства за тоа.
Тутунарите од Прилеп, пак, бараат цената за откуп на килограм тутун од прва класа да изнесува 600 денари.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
