Македонско Американската Алумни Асоцијација во Струмица организираше панел дискусија како младите да препознаат и пријават коруптивни случаи. Стравот од репрекусии и немање доверба во институциите се најчестите причини што младите не пријавуваат корупција. Зорица Трајкова Стрезовска, претседател на МАА подвлече дека ретко се охрабруваат младите да пријават корупција кај надлежните. Доволно се информирани за ова појава но или не знаат каде и како, или се плашат од репрекусии од заедницата, оти немаат доверба во институциите.
Универзитетскиот професор и поранешен заменик директор на Управата за финансиска полиција Берат Дехари предложи нов начин на пријавување на сомнителни коруптивни случаи. Тој подвлече дека треба да се најде соодветна апликација преку која младите преку своите паметни телефони ќе пријават за одредени сомневања или пак за случаи на корупција. Токму високата корупција е една од причините што младите разочарани се повеќе заминуваат во странство.
Во Струмица има два случаи кои се иницирани од млади и добија судска завршница во која е докажана корупција, кажа на панел дискусијата судијката Цона Каламерникова. Таа апелираше младите повеќе да се интересираат како работат судовите при случаи на корупција, да знаат да распознаат што е корупција но и како да пријават а не недовербата кон судовите да ја градат на паушални изјави.
Македонско Американската Алумни Асоцијација со серијалот на вакви панел дискусии со младите се обидува да ја зголеми свеста за потребата од борба против корупцијата.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
