Министерот за социјална политика, демографија и млади, Фатмир Лимани, заедно со заменик-министерот Ѓоко Велковски, ја посетија Јавната установа Завод за заштита и рехабилитација Бања Банско во Струмица – установа која со децении претставува симбол на грижа, посветеност и човечност кон лицата со телесен инвалидитет.
Претставниците од Министерството беа пречекани од директорот на установата, Ѓорѓи Пиљафов, кој ги информираше за моменталната состојба, капацитетите и програмите што се спроведуваат во установата.
Во Бања Банско моментално престојуваат 45 корисници на возраст од 19 до 69 години, кои оваа установа ја сметаат за свој дом.
Министерот Лимани и заменик-министерот Велковски разговараа отворено со корисниците и со вработените, слушајќи ги нивните потреби, предизвици и предлози за унапредување на условите за живот и работа. Тие порачаа дека вратата на Министерството е секогаш отворена за дијалог и дека политиките ќе се креираат заедно со оние на кои им се наменети.
„Грижата за ранливите категории не е само институционална обврска – тоа е наша морална должност. Бања Банско претставува пример за општество засновано врз човечки вредности, и затоа сме тука – за да слушаме, учиме и преземаме конкретни чекори,“ изјави министерот Лимани.
Заменик-министерот Велковски нагласи дека инклузивноста и достоинството мора да бидат во срцето на секоја социјална политика
„Ќе се залагаме за подобрување на условите во сите установи низ државата, со реални мерки и континуирана поддршка.“
Директорот Ѓорѓи Пиљафов ја изрази својата благодарност за посетата, оценувајќи ја како силен показател дека државата стои зад оваа институција и нејзината мисија.
Со вакви активности, Министерството за социјална политика, демографија и млади го потврдува својот фокус на изградба на праведно и хумано општество каде што секој човек има право на поддршка, еднакви шанси и достоинствен живот.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
