Градоначалникот на општина Василево, Славе Андонов, учествуваше на настан насловен како: Од политика до практика: зајакнување на меѓуопштинската соработка во локалната самоуправа, каде го претстави искуството на општина Василево која е пионер во практикувањето на меѓуопштинската соработка во Република Македонија.
Поздравувајќи ги присутните меѓу кои и Министерот за локална самоуправа Златко Перински, Генералниот секретар на Владата Игор Јанушев, Министерот за европски прашања Бекир Салиу, Душица Перишиќ – извршен директор на ЗЕЛС и Bagrat TUNYAN, државен менаџер за Република Македонија раководител на тимот за стратешко планирање, развој на политики OECD/SIGMA, Андонов потенцира дека Меѓуопштинската соработка е од суштинско значење за развојот на локалната самоуправа.
„Оваа тема не е само административна категорија, ниту пак законска можност предвидена во прописите. Таа претставува реален инструмент за јакнење на капацитетите на општините, подобрување на услугите за граѓаните и обезбедување одржлив локален развој“, потенцира Андонов.
Во своето обраќање градоначалникот даде детално образложение на воспоставувањето, организацијата и целта на механизмот на соработка, со посебен акцент на клучните поуки од практичното функционирање на овој модел на соработка.
„Со процесот на децентрализација во Република Македонија општините добија нови надлежности во областа на урбанизмот, локалниот економски развој, комуналните дејности, образованието и наплатата на локалните даноци и такси. Тоа беше историски момент – но и момент на одговорност. За мали и рурални општини како Василево, Босилово и Ново Село, предизвикот беше јасен: како да обезбедиме квалитетна, професионална и законита администрација со ограничени ресурси? Одговорот беше во партнерството. Во таков реформски амбиент, кога децентрализацијата веќе не беше само законска одредба туку реална обврска, трите соседни општини направија визионерски чекор“,рече во своето обраќање градоначалникот Андонов, осврнувајќи се на амбиентот, условите, можностите и потребитево кои општина Василево со соседните Босилово и Ново Село, го започна процесот на Меѓуопштинска соработка во три области: даноци и такси, урбанизам и инспекциски надзор. Успешен модел кој во 2008 година од ЗЕЛС доби признание за најдобра општинска практика во областа на зголемување на квалитетот на услугите во процесот на децентрализација, а Советот на Европа ја препозна и ја вклучи во своите извештаи како пример на добра практика.
Во текот на своето излагање градоначалникот Андонов го презентираше моделот на организација и постигнатите резултати на заедничките административни тела: рационализација на трошоците, професионализација на локалната администрација, зголемен квалитет на услуги кон граѓаните и зајакната меѓуинституционална доверба.
Андонов се заблагодари и на поддршката на УНДП во рамки на чии проект „Меѓуопштински партнерства за подобрување на квалитетот на јавните услуги“, во 2006 се одвиваше процесот на МОС како и набавката на опрема за функционирање на планираните заеднички активности. Градоначалникот Андонов се осврна и на предизвиците во делот на одржливоста на ваквиот модел, кој видоеизменет од почетокот на неговото воспоставување, сеуште функционира меѓу општините Василево, Босилово и Ново село.
„Меѓуопштинската соработка не треба да се сфаќа како статичен договор. Таа е жив систем што мора да се адаптира на новите околности – економски, урбанистички и институционални“, нагласи Андонов воден од придобивките на ваквиот систем.
„Верувам дека меѓуопштинската соработка претставува еден од најмоќните инструменти за зајакнување на локалната самоуправа, особено во руралните и помалите општини. Денес, повеќе од кога било, сме соочени со нови предизвици – дигитализација, енергетска ефикасност, климатски промени, европска интеграција. Сите овие процеси бараат капацитет, знаење и финансиска стабилност. Меѓуопштинската соработка нуди решение. Таа не ја намалува автономијата на општините – таа ја зајакнув“, е ставот на Андонов- градоначалник на една од трите општини- пионери во практикувањето на Меѓуопштинската соработка-модел кој со извесни модификации дава резултати 20 години.
Во тој контекст е и неговата порака упатена од денешниот настан:
„Денес,сакам да испратам порака дека меѓуопштинската соработка не треба да биде исклучок, туку правило. Верувам дека и во иднина, преку партнерство помеѓу општините и поддршка од Министерството за локална самоуправа, ќе можеме да изградиме посилна, поефикасна и поодговорна локална самоуправа – во служба на граѓаните“.
Настанот се одржа во Скопје во организација на SIGMA (Support for Improvement in Governance and Management), OECD (Organisation for Economic Co-operation and Development) и Министерството за локална самоуправа.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
