Зајакнување на капацитетите на СЕММ како независно тело, негова поголема промоција и видливост, изнаоѓање модели на сигурно финансирање. Ова беа препораките на медиумските работници и новинари од Југоисточниот плански регион кои во рамките на проектот ,,Поддршка на слободата на изразување во медиумите во Северна Македонија’’ што го имплементира СЕММ со поддршка на делегацијата на ЕУ во земјава дебатираа на тема ,,Саморегулацијата и нејзиниот развој и предизвици’’. Целта на оваa средба беше да се слушнат мислењата на медиумските работници за работата на ова тело, но и да предложат препораки за иднина, имајќи предвид дека вакво тело е потребно во медиумскиот простор. На средбата свое излагање имаше Мирче Адамчевски, претседател на Комисијата за жалби при СЕММ кој говореше за седумгодишниот развој на ова независно тело, неговото значење како и соработката со останатите општествени чинители во државата.
,,Медиумската саморегулација преставува механизам кој прави рамнотежа помеѓу слободата на медиумите и тенденцијата таа да биде злупотребена. Нашата основна цел е медиумите да ги бранат приниципите на етичко и пофесионално новинарство кое ги почитува човековите права, при што нема да биде загрозена уредувачката политика. Имаме соработка со сите медиумски и новинарски здруженија. Дел сме од Мрежата за борба против говорот на омраза, соработка имаме и со Народниот правобрител. Нашата улога е да ја заштитиме медиумската слобода, но и да ја заштитиме јавноста од злоупотреба на медиумската слобода, кажа Адамчевски. Тој како претседател на Комисијата за жалби истакна дека за овој период до нив стасале стасале стотици жалби и претставки, претежно за прекршување на членот 1 од Кодексот на новинари, што се однесува на пласирањето точна и проверена информација.
Посебен акцент на дебатата беше ставен на потребата од системска поддршка на саморегулативното тело, имајќи предвид дека работата на СЕММ не подразбира само решавање на жалби и претставки за непрофесионално информирање, туку саморегулативното тело заедно со останатите медиумски организации активно учествува во креирање модели за истакнување на професионалното новинарство, медиумската писменост, медиумската слобода, а паралелно ја штити јавноста од злоупотреба токму на медиусмката слобода. Од таа причина, како што кажа Адамчевски, формиран е Регистар на професионални онлајн медиуми, чија бројка во моментов изнесува 151 членки кои се заложиле дека ќе го почитуваат Кодексот на новинари во објавувањето на информации, со транспарентно објавување на уредувачкиот тим и структурата на сопствеништвото. Регистарот на професионални медиуми кои јавно се залагаат за професионално известување е достапен на https://promedia.mk/main.
Беа изложени повеќе модели на поддршка на саморегулативните тела во повеќе држави во Европа со оглед дека истите имат стручни служби, комисии за жалби, а се потребни и средства за различни видови активности, како на пример истражувања, публикации, кампањи, итн. Во дел од европските држави саморегулацијата ја подржуваат медиумските организации, во други пак освен од медиумите поддршка има и од државите која е безусловна без каков било притисок. Саморегулативните тела пак на балканските простори доминантно се финансираат од донатори.
,,Со цел задржување и унапредување на етичкото известување во медиумите потребна е системска поддршка. Околу ова прашање веќе разговараме и низ телата и органите на СЕММ, верувам дека ќе најдеме некој модел за да се зајакне ова тело со стабилни извори на финасирање, бидејки засега функционираме благодарение на донатори, истакна Адамчевски“.
Новинарите од Југоистокот сметаат дека треба да се овозможат услови за зајакнување на капацитетите и улогата на СЕММ како значајно тело, со цел да се избегне регулацијата од државата, но и да се заштити јавноста од злоупотреба на медиумската слобода. Предложија изработка и емитување на видео спотови за медиумската писменост и значењето на професионалното известување, од страна на членките на Регистарот на професионални онлајн медиуми. Паралелно предложија да се најде модел и за државна поддршка на СЕММ преку државните агенции за комуникации и медиуми. Познавајќи ја финансиската состојба на медиумите, се уште постои сомнеж дека ќе се успее со самофинансирање на саморегулативното тело, но сметаме дека е потребна и безусловна поддршка од државата, истакнаа новинарите.
Серијалот средби за моделите за системска поддршка на СЕММ, ќе продолжи и во останатите плански региони во земјава.
фото архива
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
