Ние имаме во целата пандемија само еден или двајца пациенти кои биле на респиратор. Конкретниот пациент, за кој се тврди дека сме го убиле, имал хронична опструктивна белодробна болест, донесен е, не од Струмица, туку од Валандово, со сатурација 55 и наод на двете белодробни крила, масивна пневмонија. Тој беше на кислородна поддршка, односно сипап маска, примен е во тешка состојба и во тешка клиничка слика, ни рекоа од штипската болница
Рецензираме пост на Фејсбук во кој е изнесена флагрантна лага, која што не само што ја нарушува репутацијата на здравствениот систем, туку и може сериозно да повлијае на тоа граѓаните кои имаат потреба да побараат хоспитализација поради ковид, доколку се водат од овие дезинформации тоа да не го сторат. Во постот објавен на 20 август 2021 година, авторот Мајк Тајсон тврди:
Мојот комшија почина здрав прав. Oд Струмица за Штип, таму на респиратор и го умреа. Дијагноза ковид, татко на 3 девојчиња. Во четири сабајле жена му не дигна сите.Закопан е во 10 денес. Во штипската болница имам заклучок таму се носат за убивање. Скопје е друга локација, Битола. Се договараат докторите на смен
„Вистиномер“ се обрати во штипската болница да ја провери оваа информација. Директорот на болницата, доктор Ален Георгиев, е фрапиран и разочаран од тврдењата изнесени во постот и ги демантира.
Сериозен човек ова не би го напишал. Ние имаме третирано повеќе од 2 илјади пациенти од кои што над 1.800 се вратени дома живи и здрави. Како може да плаќаме за дијагноза ковид, кгоа ние не ја ни утврдуваме дијагнозата, туку тестовите ги прави Институтот за јавно здравје – Скопје. Таму се потврдуваат тестовите. Ние имаме доказ за сите пациенти, компјутерски снимки од нивните бели дробови. Ние се бориме да ги спасиме нивните животи и во скафандер сме и на плус 40 степени и на минус 10 степени. Сметам дека тие пациенти, кои што беа во штипската болница и лежеа тука, се директни сведоци кој се борел за нив, кој не спиел ноќи за нив, додека тие се бореа за здив и си заминаа дома излекувани, ни рече доктор Георгиев.
За целата измината недела, во штипската болница починал еден единствент пациент, на 43 годишна возраст. Од штипската болница за „Вистиномер“ велат дека тој воопшто не бил на респиратор.
Ние имаме во целата пандемија само еден или двајца пациенти кои биле на респиратор. Конкретниот пациент, за кој се тврди дека сме го убиле, имал хронична опструктивна белодробна болест, донесен е, не од Струмица, туку од Валандово, со сатурација 55 и наод на двете белодробни крила, масивна пневмонија. Тој беше на кислородна поддршка, односно сипап маска, примен е во тешка состојба и во тешка клиничка слика, ни рекоа од штипската болница.
Целата лага дека на семејствата на починати од ковид им се нудени пари, потекнува уште од 2020 година. Ама, немаше информации ни кој ги дава парите, ни зошто, а еден куп семејства со ковид пациенти не добија ни денар. Министерот за здравство, Венко Филипче, во интервју пред една година рече дека апсолутно нема никаков финансиски бенефит ни за државата, ниту од бројот на пациенти, ниту од починатите и тоа е дефинитивно една лажна вест.Сумите што претходно се споменуваа, дека наводно им биле нудени на семејствата на починатите од ковид, беа 2 илјади евра.Но, за тоа пишувавме лани. На ниеден здравствен систем не му одговара да расте бројот на починати од коронавирусот. Сите земји, вклучително и нашата, се борат да го задржат бројот на заразени и починати на најниско можно ниво. Високата смртност не им одговара ниту на лекарите, кои се гордеат и се радуваат на секој спасен живот. Кога државата хипотетички би имала корист од поголем број починати од коронавирусот, ќе го направи тоа со задолжително земање брис кај заболен и починаат. Оваа варијанта би била и многу поевтина од фиктивните 2 илјади евра што се спомнуваа во ланските постови.Постот што го рецензираме го оценуваме како невистинит, но, исто така, забележуваме дека станува збор за клеветнички наратив кој внесува недоверба во македонскиот здравствен систем, што, пак, може да претставува опасност по јавното здравје и да ги обесхрабри лековерните читатели на постот да не бараат медицинска грижа во болнички услови, ако таа навистина им биде потребна. Ваквите состојби се загрижувачки кога станува збор за јавното здравје.
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
