Струмица до 5 август ќе биде центар на филмската уметност со оглед дека по 19-ти пат се одржува интернационалниот филмски фестивал „АСТЕРФЕСТ“. Со самото отворање беше доделена и наградата „Астер“ ба македонскиот режисер и сценарист Антонио Митрикески, кој оваа награда ја доби за неговата исклучителна филмска поетика и естетски вдахновениот и минуциозен филмски опус.
,,Филмот е колективна работа. Еден човек не прави филм. Наградата мене ми даде поттик да работам, но и да ги отвори портите на младите автори, кои ги има во изобилие во Македонија. Да им се даде шанса, затоа што не смееме да зборавиме дека филмот е еден од најголемите амбасадори на една земја, рече Митриќески во своето обраќање по примањето на наградата „Астер“.
Во петте дена на фестивалот ќе бидат прикажани 24 филмови во конкуренција, од исто толку земји и уште четири филмови во ревијалната програма. Основачот на Фестивалот и уметнички директор, Горан Тренчовски, се заблагодари на сите кои помогнале во организирањето на фестивалот во изминатитe 19 години, а посебно на Општина Струмица.
-Од година во година Фестивалот расте, се развива. Ја задржува својата физиономија, но трошоците се зголемуваат и секако во таа смисла би сакал да продолжи таа соработка со институциите на државата и, пред се, со Општина Струмица, која е пример за поддржувач на културата и уметноста, рече Тренчовски.
Присутните ги поздрави и првиот човек на Струмица Костадин Костадинов
,,Струмица беше, останува и ќе продолжи да биде еден од најголемите културни центри во државава. Покрај многуте нешта со трајни културни и традиционални вредности, заслугата за високиот рејтинг на нашиов град на културен план, ја имаат и бројните меѓународни манифестации, меѓу кои е и Интернационалниот филмскиот фестивал „Астерфест“, како еден од најважните културни белези на нашиот ѕвезден град. Убеден сум дека сите заедно ја споделуваме радоста од речиси дваесетгодишниот успешен опстој на овој фестивал, кој од година во година бележи континуиран растеж, рече Костадинов.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
