Репрезентацијата на Македонија загуби од Израел со 3:2 (26:24, 25:22, 22:25, 24:26, 15:9) во последниот натпревар на традиционалниот меморијален турнир во одбојка „Бранко Хаџииљоски Чајка“, што се одржа во Струмица.
Противникот беше одличен тест за нашата репрезентација пред квалификациските натпревари за ЕП 2026 со Грузија и со Грција на 17-ти и на 25-ти август. Израелците ги освоија првите два сета, црвено-жолтите израмнија, но не успеаја да направат целосен пресврт, па со две победи го освоија првото место. Ние сме втори со триумф над Косово и пораз од Израел.
Капитенот Никола Ѓоргиев беше најефикасен на натпреварот во салата „Парк“ со 24 поени, Александар Љафтов заработи 19, двоцифрен беше и Филип Маџунков со 13. Филип Савовски изброја 9, Владо Милев 8, Ѓорѓи Ѓоргиев 3, а резервистот Филил Лепидовски придонесе со 1 поен.
Избраниците на селекторот Хари Наковски имаа послаб процент на напад од Израелците, формираа еден активен блок повеќе, но имаа три аса помалку, па вторпат загубија од денешниот ривал во подготовките за квалификациите за континенталниот собир. Претходно ги одмерија силите и на заеднички тренинг во средата.
До патувањето во Грузија во петок, македонските одбојкари ќе тренираат во Струмица и на тој начин ќе се обидат да ја достигнат потребната форма.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
