Организацијата на жени од Струмица, заедно со активистки од женските кружоци од Сачево и Ново Село и претставнички на уште осум локални женски организации, остварија средба со Клубот на пратенички при Собранието на Македонија. На средбата учествуваа вкупно 16 жени активистки од руралните средини, кои споделија конкретни предлози и искуства во насока на подобрување на локалната демократија.
Женските организации истакнаа дека за да се обезбеди реално учество на жените во процесите на планирање, консултирање и одлучување на локално ниво, потребно е да се направат измени во Законот за локална самоуправа, со воведување повеќе-фазна постапка за учество на граѓаните и посебни гаранции за женско учество. Дополнително, тие ја нагласија потребата од зајакнување и формализирање на месната самоуправа, со гаранции за родово балансирано претставување, како и обезбедување просторни и финансиски ресурси за месните заедници за жените да можат реално да се вклучат..
Средбата ја отворија претседателката на Клубот на пратенички, Јована Тренчевска и заменичката-претседателка на Комисијата за еднакви можности на жените и мажите, Весна Ѓорѓиева и извршната директорка на Акција Здруженска, Марија Савовска.
Ленче Христова од Организација на жени од Струмица истакна дека жените систематски се исклучувани од локалните процеси. Таа потенцира дека единствено преку јасно утврдени механизми и системски решенија може да се обезбедат трајни демократски навики, транспарентност и одговор на специфичните потреби на жените. Христоваги повика пратеничките да го поддржат закажувањето на 52-та пленарна седница за усвојување на измените на Законот за локална самоуправа
Женските организации порачаа дека локалните проблеми — водоснабдување, пристап до услуги, економска активност и учество во одлучување — се прашања од национален интерес и мора да бидат решени преку системски политики кои ги земаат предвид специфичните потреби на жените од руралните подрачја.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
