Левица за првпат ќе учествува на Локални избори во Струмица. Тоа ни го потврди Јасмина Пијанманова модератор на Локалната организација „ Левица“ во Струмица и член на ЦК на партијата која ќе биде носител на листата. Излегуваат со советничка листа бидејки Советот е клучниот орган кој ги носи одлуките и ги штити интересите на граѓаните. Таа тврди дека пред струмичани ќе излезат со обични луѓе кои ќе се спротивстават на бизнис политичките партии и бизнис поединци моќници.
Дрнка.МК : Се спрема ли Левица за локалните избори 2025 година во Струмица
Јасмина Пијанманова: Да, политичката партија „Левица“ активно се подготвува за локалните избори што ќе се одржат во октомври 2025 година. Нашата мотивација за овие избори е голема, бидејќи за првпат настапуваме во Струмица како политичка опција која носи свежа енергија, јасна визија, поинаков дискурс во јавниот настап и практикување на локалната власт.
Како партија, ние сме гласот на народот, особено на обесправените, и жесток опонент на бизнис – партиите СДСМ и ВМРО – ДПМНЕ кои повеќе од три децении владеат без суштински резултати. Нивното владеење се темели единствено на одржување на моќта преку уништување и узурпација на државните и општинските ресурси, притоа оставајќи го народот без најосновните услови за живот – чиста вода за пиење и чист воздух за дишење.
На овие избори ја бараме поддршката од граѓаните за да обезбедиме што поголем број советници за да бидеме коректив во донесувањето и креирањето на локалните политики. Нашата мисија е јасна: да изградиме локална власт во служба на граѓанинот, а не во корист на поединци, бизнис кругови и партиски елити.
Затоа излегуваме на овие локални избори со јасна порака – време е за промена во Струмица, време е за потилика која работи за обичниот човек и јавен интерес.
Дрнка.МК : Со што ќе излезе „Левица“ во Струмица – кандидат за градоначалник/листа на советници ?
Јасмина Пијанманова: Политичката партија „Левица“ ќе настапи на локалните избори во Струмица со своја Советничка листа за избор на советници во Советот на Општината. На овие избори нема да понудиме кандидат за градоначалник. Сметавме дека најисправно е првиот настап да го насочиме кон Советот.
Советот е клучниот орган на локалното владеење, бидејќи претставува баланс на моќта и демократска контрола. Ако Советот биде ставен под целосна контрола на партиските центри на моќ, тогаш локалната самоуправа ја губи својата суштина. Токму затоа нашата цел е да имаме советници во Советот кои ќе бидат коректив и гаранција дека интересите на граѓаните ќе бидат заштитени.
Дрнка.МК : Се знаат ли луѓето, може ли накусо за профилот на кандидатите што е ги понуди Левица?
Јасмина Пијанманова: Политичката партија „Левица“ веќе ги има избрано луѓето кои ќе бидат дел од Советничката листа за Струмица, законскиот рок за поднесување е во тек и наскоро ќе бидат јавно објавени. Она што можеме да го истакнеме е дека тие се обични луѓе, кои секојдневно работат, живеат со проблемите на граѓаните и се соочуваат со истите неправди како и обичниот граѓанин. Нашите кандидати не се дел од бизнис – структури, доктори или политички елити – тие доаѓаат од народот и ќе бидат вистинскиот негов глас во Советот.
Дрнка.МК : Што очекува Левица од овие избори во Струмица?
Јасмина Пијанманова: Очекуваме граѓаните да ја препознаат искрената борба и да ни дадат поддршка за да можеме да изградиме силна, народна и корективна локална власт, за да можеме одговорно да управуваме со ресурсите на општината. Време е за промена, време е за Левица во Советот на Струмица!
Дрнка.МК : Имате ли сознание освен во Струмица дали Левица ќе има свои советнички листи и кандидати за градоначалници во Југоистокот?
Јасмина Пијанманова: Еве, малку да најавиме од она што го знам. Во југоисточниот регион ќе имаме советнички листи во општина Босилово, Радовиш, Валандово, Гевгелија. А во Гевгелија ќе имаме и кандидат за градоначалник.
Лани Левица настапи на парламентарните избори од Југоистокот за пратеник беше избран Сашко Јанчев
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
