Најдоцна до април идната година, коритото на реката ,,Сушица’’ во Радовиш треба да биде регулирано и уредено, за да во иднина се спречи излевањето на истата при обилни врнежи од дожд. Ќе се регулира критичниот дел на реката кој во изминатиот период честопати предизвикуваше поплави и огромни штети на инфраструктурата и правните лица во овој дел на градот. Станува збор за проект на Центарот за развој на Југоисточниот плански регион кој ги обезбеди средствата од програмата за прекугранична соработка со соседна Бугарија во висина од 324 илјади евра.
,, И покрај пандемијата со коронавирусот кој ги забави работите во нашата држава, ние не смееме да застанеме во делот на решавање на критичните прашања како што се последиците од климатските промени и поплавите во Радовиш. Со овој проект се планира реконструкција на најкритичниот дел од реката ,,Сушица’’, која прави проблеми при надоаѓање на водите при обилни врнежи на дожд. Овде ќе се исчисти речното корито, ќе се прават каскади, ќе се уредуваат ѕидовите и дното на коритото, ќе се уредува кеј покрај реката кој ќе биде озеленет’’, изјави директорката на Центарот Жулиета Ѓуркова која подвлече дека се планирани и едукативни работлници за подигнување на јавната свест за климатските промени и поплавите
Согласно проектот ќе се регулира потегот на реката ,,Сушица’’ кој се наоѓа лево од влезот во Радовиш во должина од 624 метри каде покрај кејот треба да се постават и канделабри со урбана опрема за прошетка и рекреација. Фирмата ,,Џови компани’’ од денеска ќе треба да ги почне сите градежни активности за овој проект чија основна цел е да ги ублажи последиците од природни катастрофи. Регулацијата на речното корито ,,Сушица’’ во Радовиш треба да го ублажи надојдениот водостој од околните ридови но и да ги ублажи можните последици од поплави во струмичкото сливно подрачје со оглед дека Сушица се влева во реката Струмица.
Градоначалникот на Радовиш Герасим Конзулов, верува дека со овој проект конечно ќе се реши еден од најголемите проблеми со кои се соочува општината при обилни врнежи дожд но и дека овој дел на градот ќе добие нов лик. Со реализацијата на овој проект тој очекува и поголема свест кај радовишани за спречување на дивата сеча на шумите над градот, бидејки тие се заштитнито бедем на градот од надојдени води.
,, Регулацијата на речното корито на овој потег е само еден сегмент, но ние сите заедно треба да дадеме свој придонес во зачувување на животната средина и да го спречиме уништувањето на шумите. Се надевам дека веќе нема да има поплави како досега а ние како општина планираме да го уредиме коритото и на останатиот дел од реката Сушица,, рече градоначалникот Конзулов
Овој прекуграничниот проект Центарот за развој на Југоисточениот плански регион го реализира со општина Сандански од Бугарија каде исто така се планирани низа активности со цел градење заеднички мерки за спречување и намалување на последиците од катастрофи во општините Сандански и Радовиш
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
