Партијата Алијанса за Албанците спинува дека според Транспаренси Интернешнл, Северна Македонија е една од најкорупираните земји во светот. Наспроти ова тврдење, во последниот Извештај на оваа организација јасно пишува дека според Индексот на перцепција на корупцијата, земјата се наоѓа на 87 место на листа од вкупно 180 држави. Со добиени 39 поени од можни 100, Северна Македонија има скок од 24 места во однос на минатата година. Партијата, исто така, изнесува и неточни наводи дека за „рангирањето на земјата придонеле издадените пасоши за светските криминалци, ослободувањето на локалните криминалци и затворањето на невини граѓани“, иако ова воопшто не се споменува во Извештајот на Транспаренси Интернешнл
Пишува:Зоран Димовски
Алијансата за Албанците деновиве испрати соопштение во кое спинува со информации поврзани со последниот Извештај на Транспаренси Интернешнл за Индексот на перцепција на корупцијата за 2021 година:
Спин: Транспаренси интернешнал денеска и официјално го потврди тоа што Алијанса за Албанците постојано го предупредуваше. Сегашниот режим е еден од најкорумпираните во светот и во овогодинешното рангирање е рангиран во групата земји како Танзанија, Суринам, Мароко, Гвајана, Етиопија, Колумбија, итн. За да биде иронијата поголема, земјите кои до вчера важеа за најкорумпирани, денес се во многу подобра позиција од нашата земја, додека далеку од Северна Македонија се диктаторските земји како Куба.
Оваа состојба има само еден виновник, хибридниот режим кој ги заробил правдата и обвинителството и инсталираше корупција во секоја сфера и институција. Да потсетиме дека во ова рангирање придонесоа пасошите за светските криминалци, ослободувањето на локалните криминалци и затворањето на невините граѓани кои немаат пари да ја купат слободата иако им припаѓа, стои во партиското соопштение на Алијанса за Албанците.
[Извор: Канал 5 – АА: Транспаренси интернешнал потврди дека Македонија е меѓу најкорумпираните земји; датум: 25.01.2022]
Контраспин: Алијансата за Албанците произволно и наменски го толкува Извештајот на Транспаренси Интернешнл којшто беше објавен на 25 јануари 2022 година. Па во тој дух, наместо да ги прикаже реалните податоци од Индексот на перцепција на корупцијата за 2021, партијата ја спинува вистината и вели дека Транспаренси Интернешнал, наводно, потврдила дека земјата е меѓу најкорумпираните држвави во светот.
Тоа не е точно. Северна Македонија, според Индексот на перцепција на корупцијата објавен Транспаренси Интернешнл, се наоѓа на 87 место од вкупно 180 земји кои се рангирани, со вкупно 39 поени од можни 100. Податок којшто говори дека С. Македонија не е една од најкорумпираните земји во светот, како што се обидува тоа да го прикаже Алијансата за Албанците.
Напротив земјава има скок од 24 места во споредба со минатата година, кога сме биле на 111 место. А, тоа според Транспаренси Интернешнл, се должи на синтезата на бодовите извлечени од извештаи и истражувања на седум независни меѓународни организации, како и начинот на кој се спроведени последните избори, процесите на реформа, судските постапки кои се водени за високипрофилни случаи на корупција, работењето на независните институции, односно Државната комисија за спречување на корупцијата, како и активностите на Владата, која направи Акциски план за борба против корупцијата.
На крајот од партиското соопштение на Алијансата за Албанците се тврди и дека за рангирање на С. Македонија придонеле „пасошите за светските криминалци, ослободувањето на локалните криминалци и затворањето на невините граѓани, кои немаат пари да ја купат слободата, иако им припаѓа“.
Но, во Извештајот никаде не се спомнуваат ваквите наводи искажани од Алијанса за Албанците. Ова за „ Вистиномер“ го потврди и претседателката на Транспаренси Интернешнл, Слаѓана Тасева.
Оттука, ставот на Алијанса за Албанците дека нашата држвата е една од најкорумпираните земји во светот, иако сме на 87 место со скок од 24 места во однос на минатата година, претставува класичен спин. А, со пласирање на информации кои воопшто ги нема во Извештајот на Транспаренси Интернешнл, дополнително се манипулира и се создава искривена слика во јавноста.
Овој напис е изработен во рамките проектот Проверка на фактите за напредокот на Северна Македонија кон ЕУ, имплементиран од Фондацијата Метаморфозис. Написот, кој е првично објавен во Вистиномер, e овозможен со поддршка на американската непрофитна фондација NED (National Endowment for Democracy). Содржината на написот е одговорност на авторот и не секогаш ги одразува ставовите на Метаморфозис, НЕД или нивните партнери.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
