Олександар Онишченко спинува кога вели дека нема измама во неговотo државјанство, затоа што тој при апликацијата не го запазил став 5 од член 7 од Законот за државјанство и премолчел битни факти. Без оглед што главниот и најголемиот кабает е при македонските органи и институции, пред сè, кај АНБ. Дополнително истрагата сè уште е отворена, па може да излезе дека има „многу повеќе од измама“, а не дека случајот му е чист
Пишува: Теофил Блажевски
Олександар Онишченко даде изјава во врска со одлуката на Владата да започне постапка за одземање на неговото државјанство при што се детектира спин:
Спин: Во моето државјанство нема измама, ниту еден грам. Не знам што да кажам. Побараа од мене да ја претставувам Македонија и да помогнам во подготовката за Олимписките игри. Ако не сакаат, јас ќе го направам тоа на мој начин. Федерацијата побара од мене, Лука Заложник ме прашуваше секој ден. Ги дадов сите официјални документи при апликацијата. Мојот руски пасош и изводот од матичната книга на родените. Имам и руски и украински пасош. Кога аплицирав за македонско државјанство, аплицирав со рускиот пасош. Се натпреварував за Русија претходно. Имам само валидни докумети, не можам да имам невалидни, јас сум официјално лице, ни рече Онишченкo
[Извор: Слободен Печат – Онишченко е изненаден… датум: 24.11.2022]
Контраспин: Изјавата на контроверзното лице по многу параметри Олександар Онишченко доаѓа по одлуката на Владата од 23.12.2022 за да се започне постапка за одземање на државјанството на овој од лани и македонски државјанин, но иако во голем дел е вистина, таа изјава сепак е спин.
По затворената седница од Владата соопштија:
Владата ја информира јавноста дека согласно членот 14 од Законот за државјанство на Република Северна Македонија, побара да се започнат активности за поништување на решението за прием во државјанство на Северна Македонија за лицето Александр Онишченко.
Владата го иницираше барањето за одземање на државјанство на Онишченко, по одржаната владина седница на којашто Агенцијата за национална безбедност информираше за случајот.
Да потсетиме, Бирн/Призма неодамна (на 11.11.2022) го обелодени скандалот и оттогаш тој не се симнува како тема од јавната сцена. Според она што го откри медиумот, станува јасно дека натурализираниот Mакедонец Онишченко има прилично „путер“ во биографијата, но главните два елемента кои не се демантирани (освен од самиот Онишченко), се дека е гонет за кривично дело перење пари во Украина, чиј граѓанин – бегалец од правдата е, исто така, овој лик и дека е на т.н. црна листа на САД од 2021 година за лица посебно означени поради манипулации на нивни компании, а кои се под контрола на трети земји (SDN листа што ја издава OFAC, Канцеларијата при американските власти што го контролира и ги санкционира странските имоти во САД). На оваа црна листа во моментов има околу 6400 имиња.
Во случајов станува збор за манипулации извршени од страна на Русија или нејзини протежеа за време на американските претседателски избори во 2020 година. Работејќи на делови од неговата биографија Призма документирано пишува:
Но, работите за Онишченко, на ниво на скандал во меѓународната политика, се издигнуваат во јануари 2021 година, кога Соединетите Американски Држави воспоставуваат санкции за него поради тоа што е „член на руската мрежа за влијание врз американските претседателски избори што се одржаа претходната 2020 година“.
Американските власти тврдат дека Онишченко му предал „преработени аудиоснимки“ од наводните разговори меѓу поранешниот украински претседател Петро Порошенко и тогашниот потпретседател на САД, Џо Бајден, на Андриј Деркач, независен украински пратеник, за кој се тврди дека е прв човек на наводната мрежа на Кремљ.
Онишченко, сепак, дал проблематични податоци
При поднесеното барање за добивање македонско државјанство (откако бега од Украина во 2016 година прво во Шпанија, па во Германија, па откако не добива државјанство, но исто така не е екстрадиран во Украина), при крајот на 2021 година, поткрепено со позитивни мислења од Олимпискиот комитет на Северна Македонија и Агенцијата за млади и спорт, Онишченко сепак не се придржувал до законот.
Имено, Владата вели дека постапува по член 14 кој ја регулира постапката за одземање на државјанство „ако се утврди дека странецот при поднесување на барањето за прием на државјанство со природување дал невистинити или неточни податоци, односно се користел со лажни исправи“.
Но, членот што регулира што треба да се поднесе за македонско државјанство и кои услови треба да се исполнат, е всушност член 7 од Законот за државјанство. Во него меѓу другото, во став 5 се наведува:
Против него (против лицето барател – н.з.) да не се води кривична постапка во Република Северна Македонија и во државата чиј државјанин е.
Формално правно, Онишченко не лаже кога вели дека поднел пасош на Руската Федерација, бидејќи има два пасоша и две државјанства Руско и Украинско. Не е јасно како, бидејќи Русија исто како и многу други земји не дозволува две државјанства. Но, тој сè уште поседува украинско државјанство, бидејќи украинските власти не му дале отпуст од државјанство или, пак, не го избришале од листата на државјани, туку активно го гони за измами вредни стотина милиони евра преку компанија за бизнис со гас.
Онишченко при поднесувањето на барањето за македонско државјанство со тоа што го премолчел тој факт, дал невистинити податоци. Исто како што со премолчувањето на фактот дека е под санкции во САД, поради сомневање за кривично дело манипулации при избори, исто така, дал невистинити податоци пред македонските органи. Тоа што македонските органи не си ја завршиле работата и носат најголем дел од кабаетот (Агенцијата за национална безбедност и делумно МВР), тоа си е друга работа и тука, откако новинарка и медиум го открија скандалот, се води истрага и веќе се изречени првите мерки – суспензија за две високопоставени службени лица во АНБ. Но, тоа не значи дека Онишченко е чист според член 7 и според член 14 од Законот за државјанство.
Оттука, тврдењето на Онишченко дадено во изјава за македонската јавност, дека во неговото државјанство нема ни грам измама е спин. Дополнително што тековната истрага во АНБ, протекувањето на пренос од затворената седница во Собранието при сослушување за ова прашање и вчерашната посета на помошникот генерален секретар на НАТО за разузнавање и безбедност Дејвид Катлер, при што се сретна, покрај другите и со Димитар Ковачевски и Бујар Османи, може да откријат дека има во овој случај и повеќе од измама, а е поврзано со безбедносната состојба во Северна Македонија и генерално кај нејзините сојузници во НАТО.
Овој напис е изработен во рамките проектот Промовирање на пристап до веродостојни вести за борба против дезинформации, имплементиран од Фондацијата Метаморфозис. Написот, кој е првично објавен во Вистиномер, e овозможен со поддршка на американската непрофитна фондација NED (National Endowment for Democracy). Содржината на написот е одговорност на авторот и не секогаш ги одразува ставовите на Метаморфозис, НЕД или нивните партнери.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
