Вкупно шест општини од Југоистокот имаа распишано јавни набавки за Новогодишно украсување кои на неколку дена пред празниците општинските центри блеснаа со новогодишен декор. Станува збор за општините Струмица, Радовиш, Гевгелија, Валандово, Богданци и Дојран кои за новогодишно украсување ќе потрошат околу 8 милиони и 200 илјади денари или околу 134 илјади евра
Струмица за оваа намена ќе потроши 3,5 милиони денари или 56 илјади евра. Тендерот што го распиша ЈП Паркиралишта го доби фирмата Линк Медија плус а градоначалникот Јанков кажа дека за разлика од лани е далеку поефитно.
Линк Медија плус го доби и тендерот во Радовиш. Таму новогодишното украсување според сајтот на Бирото за јавни набавки чини 1 964 700 денари или за околу 32 илјади евра. Во Радовиш освен плоштадот украсени се и повеќе улици и пред општинската зграда.
Гевгелија за Новогодишно украсување годинава ќе потроши 706 230 денари или околу 11,5 илјади евра. Според Бирото за јавни набавки таму тендерот го доби Димензија 360 од Скопје. Таму на повеќе локации поставени се декоративни украсни елементи а има и две новогодишни елки.
Фирмата Димензија 360 од Скопје ги доби тендерите и во Валандово и Дојран. Во Валандово за украсувањето општината ќе потроши 1 255 043 денари или околу 20 илјади евра додека Општина Дојран за оваа намена ќе треба да плати 548 995 денари или околу 9 илјади евра.
Јавна набавка за новогодишно украсување има и Општина Богданци . Таму тендерот беше за набавка на материјали и украси и чини околу 298 599 денари или околу 5 илјади евра а го доби фирмата Делта компани од Скопје. ( В.Трајков)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
