Во три работилници во Струмица, карневалското здружение „Струма“ ја работи годинашнава маска за Струмичкиот карневал. Во едната се прават последните детали односно финеси, во друга пак се шијат маските од глава до петици , додека во третата мажите го работат возилото за да ја илустрира пораката што сакат да ја испратат.
Маската е насловена „Аманет“ во чест на починатиот член Бранко Достинов еден од основачите на групата „Струма“. Тој постојано им сугерирал на членовите да работат, да се маскираат и да ја продолжат традицијата но и да се обидат да внесат во карневалската магија што повеќе млади. Годинава нивната маска ќе брои 40 учесници додека возилото ќе биде долго 14,5 а високо околу 4,5 метри кое ќе ги симболизира маскирањето преку аманетот на Бранко.
,,Карневалот е вроден во нашите души, ние си го сакаме карневалот и си ја сакаме традицијата од се срце. Тие моменти, тие два три часа живееме во друг свет, во една магија што не исполнува. Тоа е нешто посебно. Ако не си маскиран, тешко може да се почувствува тоа“, вели Добрила Достинова
Мажите пак од групата ,,Струма“ цели три месеци го работат возилото. Повеќе стотици килограми железни профили, текстил, сунѓер ќе ја илустрираат карневалската магија. Ќе има карневалска шапка со две маски. Мажите се собираат навечер во механичарска работилница и го работат возилото кое годинава ќе биде доста големо.
,,Тоа една сила или љубов кон карневалот. Многу денови работа за три часа преставување. Најтешко ни е кога ја напуштаме трасата а сме вложиле толку труд во возилот. Но кога ќе ги слушнеш позитивните реакции од граѓаните некако полесно е“ вели Митко Кармзов задолжен за подготовка на возилото. (В.Трајков)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
