После националната арена ,,Тоше Проески’’ , струмичкиот фудбалски стадион „Благој Истатов“ поранешен Младост е втор во земјава кој ги исполнува стандарди на УЕФА за одигрување на фудбалски натпревари од висок ранг. Станува збор за спортски комплекс кој е под концесија на ФК ,,Беласица’’ каде фудбалерите од овој клуб ги играат своите натпреварите, но го користат и прволигашот Академија Пандев и останатите фудбалски клубови од Струмица . Повремено се користи и за репрезентативни настапи а во изминатиот период беше место каде македонските клубови ги играа мечевите од Еврокуповите.
(Стадионот во Струмица е втор во земјава кој ги исполнува условите на УЕФА)
Според класификацијата на УЕФА, фудбалскиот стадион во Струмица од 2017 тата е од трета класа согласно нивните стандарди – доволно за да се одиграт одредени меѓународни натпревари под нивна организација. Токму затоа пред три години на струмички Младост , македонската фудбалска репрезентација ги одигра мечевите од квалификациите за пласман на СП во Русија 2018 со селекциите на Албанија и Лихтенштајн. Претходно во 2009 тата беше место за пријателскиот фудбалски меч меѓу Македонија и Канада но беше и седиште на мечевите на Беласица против протугалскиот Лешоеш и словенскиот Целје но и за други македонски клубови при настапите во квалификациите за Лига на шампионите или Лигата на Европа
Во моментов стадионот во Струмица е со капацитет од 9 200 места со инсталирани четири огромни рефлектори за одигрување ноќни мечеви со опрема за осветлување при прекин на енергија, дисплеј и сите потребни помошни простории за натпревари од висок ранг како за безбедност така и за мониторинг на случувањата во и надвор од стадионот
Но како успеа поранешниот стадион ,,Младост’’ граден во 1950 година со капацитет од 6000 седишта да стаса до втор по услови во земјава и да биде класифициран како стадион кој ги исполнува условите на УЕФА.
Се отпочна откако ,,Младост“ како државен фудбалски стадион го доби под концесија ФК ,,Беласица’’ во 2000 тата период кога со овој клуб раководеше сега починатиот Ванчо Таковски . Во негов период Беласица од Втора се врати во Прва лига и излезе во Купот на УЕФА. Паралелно како клуб изработија проект за проширување на стадионот со капацитет од 22 илјади седишта за што почнаа да се барат извори на финансирање.
Во 2002 на повикот на ФИФА од програмата ,, ХЕТ ТРИК“ , ФК Беласица преку ФФМ аплицираше за добивање на средства за изградба на јужната трибина. Според Ѓоко Димитриевски од проектантската фирма ,, Архус’’ која го изработила проектот и учествувале во изградбата, добиле 400 илјади долари со кои се подигна трибината до одреден стадиум. Како што не информираше Димитриевски паралелно аплицирале и за средства и од ,,ГОЛ ПРОЕКТОТ“ на УЕФА од каде добиваат околу 660 илјади швајцарски франци за да се заокружии проектот со 10 тина реда седишта и да се покрие целата јужна трибина и уреди подтрибинскиот простор.
(Сеп Блатер на отворањето на стадионот Младост во Струмица)
Во 2005 ноември стадионот го пушти во употреба тогашниот прв човек на ФИФА – Сеп Блатер кој истакна дека со новата трибина ,,Младост“ ги исполнува условите за одигрување на меѓународни репрезентативни мечеви но и за клупски натпреварувања под капата на УЕФА. Репрезентативно го сефтосаа селекциите на Македонија и Канада во 2009 тата каде домаќиите славеа со 3:0.
(Македонија – Канада во 2009 на стадионот Младост)
Беласица во тој период почна да паѓа во домашните првенства и од Прва лига стаса до третолигашко натпреварување. Клубот добива нов сопственик Славчо Васков Пинда. Во 2017 тата со финансиски средства на ФФМ, Агенцијата за млади и спорт, општина Струмица и коцесионерот ФК Беласица како што објавија тогаш медиумите во стадионот Младост се инвестираат средства во висина од околу 2 милиони се со цел да бидат исполнети условите за одигрување на мечеви под капата на УЕФА
(Летото 2017 се монтираа монтажни трибини на Младост во Струмица)
Се подигнаа источна и западна трибина. Станува збор за монтажни трибини со капацитет од 1200 седишта. Во тој период се надоградија рефлекторите со инсталација на генератори во случај на снемување струја. Трибините добија нови столчиња нумерирани. Се изградија и ТВ платформи за комплетен пренос а се постави и огромниот дисплеј. Инсталирани беа и камери за мониторинг систем за следење на случувања на и вон стадионот, од посебна контролна просторија. Со последните инвестиции во ,,Младост“ овој стадион станува место за одигрување на врвни натпревари
(Македонија – Лихтенштајн на Младост од квалификациите за СП во Русија 2018)
Есента во 2017 Македонија ги играше мечевите од квалификациите за Светското во Русија. Со Албанија фудбалската репрезентација ремизираше 1:1 а против Лихтенштајн славеа со 4:0.
Во септември 2019 тата концесионерот ФК Беласица донесе одлука да го преименува стадионот Младост во ,,Благој Истатов’’ . Претседателот на ФК Беласица, Славчо Васков- Пинда донесе одлука, денеска, на денот на одбележувањето на годишнината од смртта на „Горостасот меѓу стативите Благој Истатов“, стадионот „Младост“ да се преименува во „Благој Истатов“, во чест на фудбалската легенда на ФК Беласица и македонскиот фудбал, човекот синоним за фудбалот во Струмица“ – информираa од ФК Беласица концесионер на стадионот во Струмица кој го држи приматот како втор најдобар фудбалски стадион во земјава за одигрување мечеви под капата на УЕФА и ФИФА
В. Трајков
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
