Инвестираме 230 милиони евра во патишта и комунални мрежи во Југоистокот, кажаа владини претставници од струмичко

Претседателот на Владата Оливер Спасовски, заедно со министерот за транспорт и врски, Горан Сугарески и директорот на Државни патишта Зоран Китанов денеска направија увид на повеќе делници од патната инфраструктура во Југоисточниот дел на нашата земја. Беа на  регионалниот пат Старо Коњарево – Ново Коњарево во општина Ново Село, во должина од 3,4 километри каде стариот мост на оваа делница е комплетно саниран и проширен, со пешачки патеки од двете страни. Техничкиот премиер кажа дека во овој регион за десетина дена ќе биде завршена  рехабилитацијата на делницата Банско-Колешино, во должина 5,6 километри

Посочи дека во текот на овој месец ќе заврши и рехабилитацијата на регионалниот пат Радовиш – Плачковица, а рехабилитацијата на државниот пат, односно на делницата од Раброво до граничниот премин Дојран, ќе заврши во август.

„Ги издвојувам овие патни правци и делници што ќе бидат завршени во текот на овој месец и во текот на летото, и сакам да нагласам дека во целиот Југоисточен регион е во тек една интензивна градежна офанзива. Се градат, реконструираат и рехабилитираат уште десеттина патни правци и делници, сè во интерес на граѓаните од овој регион“, потенцираше премиерот Спасовски.

Министерот за транспорт и врски, Горан Сугарески во својата изјава потенцираше дека оваа Влада покажа како се гради во државата, дека имаме најголеми инвестиции во градежништвото

„Имаме силна градежна офанзива низ целата држава, нема место или град каде што не се работи. Само овде во Југоисточниот регион инвестираме преку 230 милиони евра во инфраструктурни проекти во патишта и комунална мрежа“, истакна министерот Сугарески.

Директорот на Јавното претпријатие за државни патишта, Зоран Китанов истакна дека веќе три години во нашата држава сериозно се гради, се рехабитираат и градат нови патишта, мостови, свлечишта како никогаш досега.

„Со еден збор, градењето не е застанато бидејќи од исклучителна важност за целата држава. Денес стигнавме по пат кој што минатата година го рехабилитиравме преку проект од Светска банка Ново Село до граничниот премин. Дојдовме до патот кој од граничниот премин од Старо Коњарево кој го поврзува целиот овој регион којшто е дамнешна желба на граѓаните од овој регион да не мора да вртат дваесеттина километри да се приклучат на патот за до граница и сега за само четири километри на еден стар земјен пат стоиме на комплетно направен пат со ширина од шест метри, реконструиран мост и задоволството на овие граѓани е големо“, потенцираше директорот Китанов.

Тој посебно истакна дека сите реновирања и градби се градат по квалитетни проекти и најави дека се при крај проектите за тесното грло Струмица – Дабиле и го најави завршувањето на проектот за Коридорот 10 за поврзување на граничен премин со Ново Село сосема нова траса и експресен пат.