Во наредниот период треба да отпочне изградба на пешачка патека од кај ,,Гранико” кон граничниот премин кон соседна Грција – проект што го реализира Центарот за развој на Југоисточниот плански регион во соработка со општина Дојран. Патеката ќе биде долга 760 метри и истата е дел од проектот ,,Збогатување на туристичката понуда во Југоисточниот плански регион’’ за кои Центарот обезбеди средства од Бирото за регионален рамномерен развој.
На распишната јавна набавка за реализација на овој проект од страна на Центарот за развој на Југоисточниот плански регион се јавиле друи 16 фирми од цела држава. Проценетата вредност на проектот изнесуваше 7,5 милиони денари или околу 120 илјади евра но на јавната електронска аукција во натпреварот да се добие овој тендер, цената за реализација на истиот падна на 5,2 милиони денари или 84,6 илјади евра. Ова најниска цена ја понуди струмичката фирма Универзал градба со која е склучен и договорот.
Според потпишаниот договор, патеката која ќе биде вдолж патниот правец кон граничниот премин треба да се реализира во рок од 4 месеци од денот на воведување на фирмата во работа. Со истиот се очекува да се создаде нова инфраструктура која ќе нуди можност за рекреација на гостите.
Трасата која води до граничниот премин е обрасната со трева со многу нерамнини, насипи од земја, и истата е запуштена и нефункционална. Се планира и уредување на зелен појас.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
