Општина Василево во соработка со лиценцираната компанија Еко-текс од Скопје поставија контејнери за собирање на текстилен отпад. Контејнерите се поставени на пет локации од кои три во општинскито центар Василево и по еден во училишните дворови во Нова Маала и Ангелци
„Општина Василево воспоставува функционален и одржлив систем за селектирање и рециклирање на текстилен отпад. Контејнерите се поставени претежно пред основните училишта и градинките, со што проектот добива и силна едукативна димензија. Целта е кај најмладите да се развива еколошка свест и чувство на одговорност кон животната средина уште од најрана возраст. Со вакви практични решенија правиме конкретен чекор кон почиста околина, намалување на отпадот, одржливо управување со ресурсите и подобар квалитет на живот за сите граѓани“, стои во објавата на градоначалникот Славе Андонов
Контејнери за текстилен отпад има дворот на општината, пред Домот на културата и во дворот на детската градинка Прва радост и по еден контејнер во училишниот двор на ООУ „Атанас Нивичански“, Нова Маала и во кругот на ПУ „Гоце Делчев“, Ангелци и новата детска градинка.
Текстилниот отпад е една од заканите за животната средина во нашето секојдневие која бара итно решавање. Општина Василево со овој чин практично се вклучува во борбата за зачување на животната средина и поквалитетен живот за сите граѓани во заедницата.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
