Конзервирана и заштитена е средновековната кула на локалитетот Пирго на Беласица. за која се смета дека била дел од одбранбениот систем на Цар Самуил. Заштитата е направена по 13 години од почетокот на археолошките истражувања.
Истражувањата укажуваат дека кулата е дел од поголем одбранбен систем кој бил во употреба уште од времето на рана Византија и продолжил да се користи во текот на Средниот век, со особено значење во периодот на Самуиловата држава.
Се работи за масивна кула со идеална квадратна основа и димензии од 10 на 10 метри и ѕидови дебели до 3 метри.
„Овој тип на кули ги датираме од 5 и 6 век, односно Рана Византија, изградена во техника емплектон, односно со добро изделакни камења, а како врзивно средство е користен варовиот малтер. Овие кули покрај тоа што се користени во 5 и 6 век век, се јавуваат и во текот на целиот среден век. Знаеме дека фортификационите објекти со делумна обнова биле користени и во средниот век и сметаме дека оваа кула била ставена во функција и во периодот на Цар Самуил“, вели д-р Душко Цветанов – виш кустос, археолог.
Конзервацијата претставува прва фаза од поширокиот проект што го реализира Завод и музеј Струмица. Во тек е изработка на идеен и основен проект за целосна реконструкција на објектот, со што се отвараат нови можности за понатамошно истражување, презентација и вклучување во културно-туристичката понуда на регионот.
„Кулата била на неколку спратови. Влезот бил на вториот спрат, значи на повисоко ниво, кровната конструкција најверојатно била на четири води, т.е. ова се податоци според аналогија на слични кули кои што егзистирале во тој период на Балканот. Доста значаен локалитет. Нашата крајна цел е по извршувањето на реконструкцијата на овој објект да направиме една мала музејска поставка со која ќе го отсликаме периодот на Цар Самуил како и да ставиме акценти на Беласичката битка. Беласичката битка можеме слободно да кажеме дека е една од најзначајните средновековни битки кои што се одиграни на тлото на денешна Република Македонија, но слободно можеме да кажеме и дека е една од најзначајните средновековни битки во Европа во првата половина на 11 век“, додава археологот Цветанов.
Сите активности поврзани со локалитетот Пирго се реализираат со финансиска поддршка од Општина Ново Село
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
