Жителите на радовишко Тополница деновиве реагираа на огромната прашина што се спушта од хидројаловиштето на рудникот Бучим заради што неможат да отворат прозорци ниту пак да излезат во своите дворови. Ова населено место се наоѓа на стотина метри во подножјето на браната каде се складира јаловината од процесот на преработка на рудата во Бучим и тврдат дека овие денови при секој посилен ветар во селото не се дише. Велат дека цели облаци со прашина се спушта над селото при што им се побелени дворовите.
,,При секој посилен ветар, селото е завиено во прашина. Иако станува збор за одредени временски периоди преку ден, но ова не се трпи. Не можеме да дишеме како што треба. Станува зобр за прашина од хидројаловиште. Од рудникот мора да интервенираат и да го активираат системот за распрскување. Не можеме да излеземе надвор а камоли да ги извршуваме секојдневните обврски.,, вели Билент Геч од населеното место Тополница
Од рудникот Бучим потврдија дека изминативе два дена одвреме навреме се подигала прашина од хидројаловиштето но тоа не било резултат на технолошкиот процес туку заради силниот ветар кој создавал виори и се кревалa прашина. Заменик директорот на рудникот Николајчо Николов вели дека работи системот за распраскување а се интервенира и со цистерни.
,, Тоа се одредени периоди од по некоја минута кога при силен ветар се созадаваат виори кои креваат прашина од хидројаловиштето. Не станува збор за проблеми со технолошкиот процес, туку заради временските услови.Во моментов е смирена состојбата. Имаме 17 топови кои постојано распрскуваат. Тој дел заради конфигурацијата на браната е подлежна на создавање виори кои креваат прашина која е видлива,, ни изјави Николов кој најави дека овие денови како фирма ќе извршиле и пошумување на дел од јаловиштето и околу него .
Жителите на Тополница со години реагираат на лошите услови за живот но и за стравот што живеат во подножјето на браната. Последниве години жителите на ова населено место почнаа да градат куќи во непосредна близина од магистралниот пат Радовиш-Штип за да бидат што подалеку од браната со хидројаловиште на рудникот Бучим.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
