Ефтим Ричлиев кој ја носеше капитенската лента изминатата година и игра на позицијата техничар во македонската одбојкарска шампионска екипа е избран за претседател на ОК „Струмица 47&72“. Ова е епилогот од вечерашново годишно собрание на кое се разговараше за и околу состојбата во клубот и предизвиците кои престојат.
Ефтим кој лани се радуваше на 12 шампионска титула, подвлече дека клубот Струмица обединува генерации успешни одбојкари и спортски работници и никогаш нема да биде ,,трговец поединец“ туку клуб на градот и на струмичани и дека ќе се бори за успех на струмичката и македонската одбојка.
,,Овој клуб обединува многу генерации успешни одбојкари и спортски работници. Клубот не е ,,трговец поединец“ и не припаѓа никому. Клубот отсекогаш бил и ќе остане градски. Едно е сигурно – клубот ќе продолжи понатаму и ќе се бори за успех на струмичката и македонската одбојка. Успесите и остварените резултати на клубот секогаш биле и ќе бидат успех на градот и заслуга на сите, никогаш на „поединци“, ни изјави Ричлиев кој упати благодарност до Владо Милев за досегашната работа.
ОК „Струмица 47&72“ лани ја освои само шампионската а Куп титулата му ја препушти на Штип УГД. Во есенскиот дел струмичани се втори веднаш зад штипјани. Ричлиев подвлече дека клубот има своја визија но не секогаш има средства и пристојни услови.
Инаку Ефтим Ричлиев е долго време во ОК Струмица а лани беше избран за спортист на Струмица (В.Трајков)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
