Општина Василево ќе дели субвенции за набавка на нов велосипед во висина од 50 % од цената но не повеќе од 6 000 денари по апликант. Ваква одлука донесе Советот на општина Василево на својата 53 седница при што беше донесен и правилникот а допрва ќе биде објавен Јавниот повик за аплицирање.
„Новата субвенција која се однесува на купување на велосипеди се однесува на полнолетни лица, жители на општина Василево и е во висина од 50% од цената но најмногу до 6 000 денари. Вкупниот Буџет ќе биде ограничен на 300 000 денари, односно во рамки на таа сума ќе бидат давани субвенциите на граѓаните кои ќе купат нов велосипед по принципот прв дојден – прв услужен до исцрпување на сумата определена со Програмата, рече Андонов, прецизирајќи дека оваа мерка е од особена важност во делот на екологијата, животната средина и спортскиот начин на живот на граѓаните.
Јавниот повик ќе трае до 31.12 2025 година и исцрпување на вкупниот планиран буџет за оваа намена кој изнесува 300 000 денари. Распределбата ќе се врши по принципот прв дојде – прв услужен. Начинот, рокот и поблиските критериуми ќе бидат определени во Јавниот повик што ќе биде јавно објавен на општинската веб страна како и на фан страната и ФБ профилот на општината и градоначалникот.
Општина Василево ги охрабрува граѓаните да ја искористат оваа мерка и да дадат свој придонес во омасовувањето на користењето на велосипедите како правилен избор за здрав живот и животна средина со помалку загадување.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
