Иван Калковалиев од Валандово и Крсте Арабаџиев од Пирава како тандем победија на годинашнава ,,Валандовска Ракијада“. Според жирито кое ги оценуваше произведените „домашни“ кои се печеа со казани на традиционален начин викендов на градскиот базен во Валдново , Калковалиев и Арабаџиев имале ракија со солиден степен на јачина, со одлична чистина, шмек, вкус. Двајцата ,, мајстори“ имаат по 25 години. Печеле ракија од грозје од сортата ,,смедеревка“ а ракијата што ја испекле од казанот имала јачина од 48 степени.
,, Тоа е мала тајна на големите мајстори“ – кажа Иван Калковалиев за Дрнка.МК откако го запрашавме што е тајната за добра и квалитетна домашна ракија произведена на традиционален начин со казани.
Тој со Крсте Арабаџиев од лани функционираат како тандем на Валандовската ракијада. Како што кажаа квалитетната ракија освен од мајсторите зависи и од сортата, квалитетот на грозјето, степенот на шекерност, процесот на ферментација на комињето.
,, Нашата ракија беше со јачина од околу 48 степени. Казанот протече за околу 60 минути а температурата ја одржувавме на исто ниво,, рече Иван кој признанието за најдобри го добија од првиот човек на Валандово Перо Костадинов.
Второто место на Валандовската ракијада им припадна на Лазар Димов и Трајче Зајков додека третото место на тандемот во состав Андон Нунов и Благој Шопов. На годинашнава ракијада учествуваа 20 тина тимови кои имаат сопствено производство на грозје и печат ракија на домашен традиционален начин. ( В. Трајков)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
