Дефектот на цевковдот на Хидросистемот „Ѓавато“ кај месноста Крај река во атарот на место Црничани – Богданско е саниран по што повторно се активирани пумпите на бунарите за Спас на Дојранското езеро кои вчера беа исклучени оти се излеваше вода во приватни ниви, пишува порталот Сакам да кажам. Веста ја потврдија и вработени од системот кои информираа дека утрово околу осум часот пуштени се да работат трите пумпи кои имаат капацитет од 200 литри во секунда. Пратеникот на ЗНАМ од Струмица Миле Цеков кој викендов беше со министерот Меџити во Ѓавато, денес на својот ФБ профил објави видеа како тече вода во каналот кој се слева во езерото.
,, Минатите денови се соочивме со политичари и одредени медиуми кои се радуваа на неуспех и штета за општото добро. Сепак, денес јас се радувам што вработените од хидросистемот Ѓавато, министерот Изет Меџити, директорката Ивана Гиновска работеа во една иста насока. Покажавме дека кога сме сложни и упорни се надминуваат сите проблеми. Се надевам дека така ќе се продолжи и во идниот период,, напиша пратеникот Цеков
Тој соопшти дека пумпите биле стопирани бидејки на одредени позиции имало ставено насипи за да се запуши цевководот односно каналот за да не се влева вода кон езерото. Од таа причина имало и избивање на цевководот кај Црничани на одредени позиции заради што биле исклучени пумпите.
,,Деновиве ќе бидат префрлени пари за да се санираат сите дефетки и пропусти на цевководот за да може 85 одсто од водата што се испумпува кај Ѓавато да заврши во Дојранското езеро,, ни изјави Цеков кој најави дека ќе бидат поднесени и кривични за лицата кои правеле насипи и се обидувале да го запушат каналот.
Во саботата кај Ѓавато беа ставени во функција три пумпи за да се полни Дојранското езеро чие ниво падна на 80 сантиметри под дозволеното. Надлежните тогаш кажаа дека неделава ќе се анализира фактичката состојба за да се види колку вода ќе завршува во езерото но и за евентуалните дефекти на главниот цевковод но и сите диви приклучоци на истиот.
Владата на една од последните седници ја усвои Информацијата за ставање во функција на хидросистемот за Спас на Дојранското езеро при што го задолжи Министерството за животна средина и просторно планирање да предвиди и алоцира финансиски средства во Буџетот за 2025 година за реконструкција на хидросистемот со цел спречување на голема еколошка катастрофа.(В.Трајков)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
