Со самата појава на коронавирусот и неговото брзо ширење поради што беше прогласена светска пандемија, научната заедница се посвети на пронаоѓање на вакцини коишто ќе го заштитат здравјето на човекот и ќе го запрат ширењето на вирусот. Досега се создадени неколку различни видови на вакцини, а земјите самостојно одлучуваат со која/кои вакцини ќе го имунизираат населението. Секоја лиценцирана вакцина е ригорозно тестирана во повеќе фази на испитувања пред да биде одобрена за употреба и редовно се проверува и откако ќе се воведе. Важно е да се знае дека придобивките од вакцините ги надминуваат ризиците од манифестација на тешка форма на болеста ковид-19 и хоспитализација. Иако вакцините против ковид-19, исто како и кои било други вакцини и лекови, можно е да имаат одредени нуспојави, сепак тие се премногу ретки. Но, ова придонесе масовно да се споделуваат невистини за нив и да се засилат антиваксерските наративи. Во продолжение прочитајте ги најголемите дезинформации кои што се ширеа за вакцините во 2021 година
Пишува: Симона Атанасова
1. Вакцините разболуваат од ковид-19
Вакцините не предизвикуваат да се разболите со коронавирусот, бидејќи ниту една одобрена вакцина не содржи активен вирус. Напротив, вакцината против ковид-19 ги заштитува граѓаните од тешка форма на болеста и ја намалува хоспитализацијата и смртноста. Но, сепак вакви тврдења вирално се ширеа во текот на целата 2021 година.
Главно со коронавирусот се заразуваат невакцинираните, додека вакцинираните граѓани кои заболеле од ковид-19, не го добиле од вакцините.
Вакцината не содржи никаков жив или активен дел од вирусот ковид-19. Нема да предизвика позитивен тест со кој се тестира активна инфекција со ковид-19, пишува на официјалната страница на Министерството за здравство наменета за разбивање на митовите околу вакцинацијата.
Дека вакцината не заразува со ковид-19 туку го учи нашиот имунолошки систем како да го препознае и да се бори против вирусот тврди и Центарот за контрола и превенција на болести на САД.
2. Вакцината ќе ја промени вашата ДНК
Во 2021 година многупати можевме да прочитаме дека вакцините против ковид-19 се генетска терапија и дека ја менуваат човековата ДНК. Но, ова не е точно
мРНКвакцините не ја менуваат вашата ДНК на кој било начин и затоа не можат да предизвикаат рак. Вакцините за Messenger РНК (мРНК) ги учат клетките како да создадат протеин што предизвикува имунолошки одговор ако некој се зарази. мРНК што се инјектира во вашето тело не комуницира со вашата ДНК. Откако мРНК ќе ја заврши својата работа, вашите клетки ја распаѓаат и расчистуваат од вашето тело. Нема трајни ефекти од мРНК во вакцината, пишува на официјалната страница на Министерството за здравство.
И Центарот за контрола и превенција на болести на САД, официјално потврдува дека вакцината против ковид не влегува во интеракција со нашата ДНК на каков било начин.
3. Вакцините влијаат на плодноста и предизвикуваат стерилитет
Една од најголемите невистини поврзани со вакцините која што предизвика големо внимание и сомнеж во вакцините е дека тие влијаат на плодноста како на мажите така и на жените и дека може да предизвикаат стерилитет.
Нема докази кои покажуваат дека вакцините влијаат врз плодноста кај мажите или жените ниту дека влијаат на процесот на зачнување, на плодот или на роденото бебе, доколку мајката која се вакцинирала сè уште дои.
Жените кои се обидуваат да забременат не треба да избегнуваат бременост по вакцинацијата тврдат и од Кралскиот колеџ за акушери и гинеколози од Велика Британија. Со слични податоци излезе и Универзитетот Џон Хопкинс од каде тврдат дека нема причина да се одложи планирањето на бременоста по завршување на процесот на вакцинација.
Американскиот Центар за контрола и превенција на болести, вели дека може да се вакцинираат оние коишто сакаат да забременат во иднина, бидејќи вакцините не создаваат неплодност.
Вакви и слични објави коишто тврдат дека вакцините предизвикуваат стерилитет, се само еден од начините на кои антиваксерските движења се обидуваат, преку лажни информации и со заплашување, да ги убедат граѓаните да не се вакцинираат.
4. Со вакцините ќе ве чипуваат
На социјалните мрежи се појавија повици граѓаните да не се вакцинираат затоа што вакцините, наводно, содржат чипови преку кои ќе се следи населението. Вистината е дека состојките на вакцините се позната и јавна информација и ниедна вакцина не содржи микрочип.
Дозата на вакцината е помала од еден милилитар. Стандардната доза на „Фајзер“ содржи 0.3 милилитри. Тоа не е доволен волумен во кој би можел да се вметне микрочип, дури и кога некој би посакал да направи такво нешто.
Нема ниту еден научен факт кој ја поткрепува теоријата дека преку вакцината во телото на човекот се вметнува чип.
5.Вакцинирањето ви го магнетизира телото
Чиста невистина е дека вакцините предизвикуваат магнетизирачко својство, и покрај големиот број на слики и видеа кои што се објавуваа на кои што се гледа како на рамењата на луѓе им се залепени метални предмети.
Наспроти овие тврдења, вистината е дека во ниту една од одбраните вакцини нема магнетизирачки компоненти. Железото е еден од најчестите метали користен во магнетите, но ниту железо ниту кој било друг метал не е спомнат во листата за составот на вакцините на ниту еден производител. Но, дури и ако вакцините содржеа метали, тие не би предизвикале магнетна реакција. Количеството на метал што треба да се најде во вакцината за да привлече магнет е многу поголемо од количествата што би можеле да бидат присутни во малата доза на вакцината.
Без оглед на тоа колку онлајн видеа и фотографии сте виделе на луѓе кои лепат лажици, клучеви и останати метални производи, магнетите не функционираат така. Лепењето на тие предмети може да биде од неколку причини што немаат никаква врска со вакцините, како, на пример, човечката пот.
6. Вакцините се отров
Широко распространета дезинформација беше и дека вакцините се полни со отрови, токсини и дека содржат графен оксид. Ништо од ова не е точно. За овие тврдења нема никакви докази, ниту има релевантни медицински истражувања кои што можат да го потврдат ова.
Вакцините се безбедни, ефикасни и развиени на безбедни платформи. Пред нивната апликација спроведени се низа тестирања од кои е утврдено дека придобивките од вакцината далекусежно ги надминуваат несаканите ефекти
7. Вакцините содржат крв од деца и мртви бебиња
Еден од обидите на антиваксерските движења да убедат што е можно повеќе луѓе да не се вакцинираат беа и сензационалистичките ударни објави дека вакцините содржат ткива од убиени бебиња и крв од деца.
Не, вакцините против ковид-19 не содржат клетки од абортирани фетуси. Меѓутоа, за да се направат некои од вакцините против ковид-19, при тестирањето и истражувањата биле користени фетални клеточни линии.
Феталните клеточни линии се нешто многу поразлично од ткиво од фетус. Тие понекогаш се користат во развојот, потврдувањето или производството на вакцини – вклучувајќи ги и вакцините против ковид-19.
Иако за правење на вакцината се користеле фетални клеточни линии, лабораториски реплицирани за време на процесот на производство, самата вакцина не содржи ткиво од фетус.
Крвни продукти, пак, воопшто не се дел од составот, ниту се вклучени во тестирањето на вакцината, ниту пак, во нејзиното производство.
8 . Вакцините се поврзани со 5Г мрежа
Теоријата на заговор дека 5Г мрежата и микрочипови во вакцините се комбиниран напор да се контролира населението – каде се движи, што прави, што купува, па дури и идеите дека со непостоечките чипови ќе се контролира мисловниот процес на индивидуата која е вакцинирана, е невистинита. 5Г технологијата во комуникациите и вакцинацијата во здравството не се никако поврзани. А како што веќе објаснивме погоре, волуменот на вакцините е толку мал, што нема ниту теориска шанса да се вметне чип во нив.
9. Вакцините предизвикуваат мутации на вирусот
Неточно е и тврдењето дека вакцините предизвикуваат нови варијации на ковид, односно дека поради нив вирусот мутира. Вистината е дека вакцините го намалува ризикот да се шири вирусот, а со тоа и веројатноста дека тој ќе мутира за да создаде нови варијанти. Научните докази, исто така, сугерираат дека голем број мутации на вирусот се појавија уште пред да биде развиена вакцината. На 20 декември 2020 година, барем 7 варијанти, односно мутации на вирусот, постоеле, а вакцинацијата не ни беше започната.
Одбивањето вакцинација, пак, нема да го ограничи еволуирањето на вирусот.
10. Вакцините се небезбедни, експериментални и не заштитуваат
Во обид да предомислат што е можно повеќе луѓе да не се вакцинираат, притоа со тоа загрозувајќи го јавното здравје, антиваксерските движења неуморно на социјалните мрежи пишуваа лаги дека вакцините не се одобрени, дека со нив се екеприментира врз луѓето и дека не се ефикасни. Овие тврдење се неточни.
Не е вистина дека вакцините се еспериментални. Дел од вакцините сè уште се наоѓаат во експериментална фаза, но за оние коишто се одобрени за имунизација, како од СЗО, така и од националните регулативи на секоја земја посебно, експерименталната фаза им е завршена и тие целосно се одобрени за користење.
Како што информираат од СЗО, постојат многу строги заштити за да се осигури дека вакцините против ковид-19 се безбедни. Како и сите вакцини, и овие вакцини минуваат низ ригорозен, повеќестепен процес на тестирање, вклучително и големи испитувања (фаза III) во кои учествуваат десетици илјади луѓе.
Вакцините против ковид-19 создаваат заштита од болеста, преку развивање на имунолошки одговор на вирусот САРС-Ков-2. Развивање на имунитет преку вакцинација значи намален ризик за развој на болеста и нејзините последици. Овој имунитет ви помага да се борите против вирусот доколку се изложите. Вакцинирањето, исто така, ги заштитува луѓето околу вас.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
