Големи гужви и колони на граничниот премин Богородица кон Грција заради продолжениот празничен викенд. Според податоците на МВР до 10 часот претпладнево низ овој премин за влез и излез од државата регистрирани се дури 13 илјади патници од кои 7.200 биле македонски државјани.
Во овој период, како што кажа портпаролот на МВР Гоце Андреевски, државата ја напуштиле 5.500 македонски граѓани..
„Заради првомајските празници зголемена е фреквенција на патнички возила на граничните премини Богородица и Стар Дојран кон Грција. На ГП Богородица пуштени се пет сообраќајни ленти за патнички возила една за автобуси и една за тешки моторни возила. Паралелно ставени се во функција сите ресурси. Заради гужвите и завршување на редовните граничните процедури времето за чекање за излез изнесува 30-тина минути“, ни изјави Гоце Андреевски.
Не е различна сликата и на ГП Стар Дојран каде заради колоните кај Гевгелија за влез во Грција, возачите самоиницијативно се пренасочуваат преку Дојран. Низ овој граничен премин до 10 часот претпладне преминале 2.680 патници од кои 1.190 се македонски, а излез од државата оствариле 960 патници. И таму се чека за излез од државата.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
