Најдобриот македонски фудбалер, великанот Горан Пандев официјално објави крај на својата богата фудбалска кариера. Тој во интервју за „Газета дело Спорт“ ја објави оваа информација, која тој ја најави уште по завршувањето на ЕП 2020 каде со Македонија настапи за првпат на едно такво натпреварување.
„После 20 години…Мојот син веќе има 13 години и во целиот живот почесто го гледав само во паузата меѓу двете сезони. Сега е време во кое треба да уживам со семејството. За првпат цело лето не размислував за фудбал и кога ќе се случи тоа помалку размислувате за фудбал и малку тренирате“, истакна Пандев.
Пандев не се гледа себеси како тренер, вели дека би сакал да работи како спортски директор или менаџер.
„Себеси се гледам како спортски директор или менаџер. Сакам да работам со деца, да им помагам, да разговарам со нив, да гледам младински фудбал. Би сакал да им се заблагодарам на сите, фала ви за сѐ. На сите навивачи, претседатели, тренери низ кариерата. Сите тие ми дадоа нешто и јас тоа нема никогаш да го заборавам“, изјави Пандев
Зад името на Пандев ќе останат над 500 натпревари во италијанската елита и повеќе од 100 гола и сигурно дека остави белег во италијанскиот фудбал. За Македонија настапи на 122 натпревари и постигна 38 гола.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
