Министерството за спорт и Владата на Република Македонија одржаа свечена церемонија на која им беа доделени Национални признанија на истакнати македонски спортисти кои оставиле длабока трага во спортската историја на нашата земја. Станува збор за добитници кои оставија огромен белег во екипните спортови, беа на високо ниво во своите клупски кариери, но воедно и ја претставуваа Македонија на најубав можен начин преку националните репрезентации, со што добија легендарен статус во нашето општество.
Меѓу добитниците е и Горан Пандев од Струмица кој испиша одлична фудбалска кариера како на клупско така и на репрезентативно поле. Признанието го прими од премиерот Христијан Мицкоски и министерот за спорт Борко Ристевски
„За мене е голема чест да бидам денес тука, заедно со спортисти кои со своите ррезултати и посветеност ја претставувале Македонија. Ова признание ми значи, а не е само мое, туку на сите што ја делев фудбалската игра, на играчи и тренери и сите кои беа дел од заедничкиот пат. Особена благодарност до ФФМ и претседателот Масар Омерагиќ и довербата за нашата заедничка работа. Посебна благодарност до моето семејство и секоја нивна жртва на мојот фудбалски пат. Горд сум што заедно испишавме историски резултати за македонскиот фудбал, што инспириравме нови генерации да сонуваат и да се борат и да веруваат. Чувствувам гордост, но и обврска да продолжиме да сонуваме за големи фудбалски работи“, изјави Пандев.
Меѓу наградените се у Дарко Панчев, Илија Најдоски, потоа кошаркарските икони Петар Наумоски и Перо Антиќ, а од ракометот имињата се најбројни, тоа се Кирил Лазаров, Стојанче Стоилов, Владо Недановски, Петар Ангелов, Марко Кизиќ, Марко Мишевски, Елена Ѓоргиевска, Гордана Нацева, Мирјана Чупиќ, Милева Велкова, Анжела Платон, Лариса Кисељова, Елена Златановска Муратовска и Клара Боева.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
