Струмичкиот карневал годинава ќе се одржува од 18 до 25 февруари а големото дефиле ќе биде во сабота на 21 февруари по веќе утврдената траса по струмичките улици. Вака соопштија од организациониот одбор на Струмичкиот карневал кои ја објавија програмата, што се ќе има во еднонеделната карневалска програма. Новитет годинава е што после големото карневалско дефиле ќе има концертна забава на отворено за сите присутни на струмичкиот плоштад. Организаторите не објавија кои ќе настапи на концертот, но ветија дека публиката ќе ужива.
,, Годинава има новитет. Имено во 21 часот ќе започне концерт кој што ќе биде за забава за карневалските маски и публиката што ќе остане на плоштадот. Сеуште сме со преговори со имињата кои ќе го одржат концертот, но верувам и ветувам дека ќе биде нешто со што струмичани ќе бидат испочитувани и тие ќе уживаат“, кажа Танкица Стојанова која беше именувана за претседател на Организациониот одбор на Струмичкиот карневал откако лани беше разрешен Александар Цицимов.
Стојанова не прецизираше колку вкупно карневалски групи ќе настапат годинава и дали ќе имаме гости од странство. Подвлече дека дел од карневалските групи од Струмица кои апстинираа последниве години се враќаат на карневалот но ќе имало и нови.
После 15 години учество годинава за првпат ќе го нема концертот под маски на музичкото училиште Боро Џони Струмица. Проблемот биле парите и кусото време за организација. За возврат место концерт под маски ќе има „Карневалски мјузикл“ со струмички деца во соработка со професор од Скопје.
Градоначалникот на Струмица Петар Јанков кажа дека годинава карневалот ќе чини 3,7 милиони денари и дека наредните денови ќе бидат исплатени средствата на карневалистите по основ на стимул или пак освоена награда. (В.Трајков)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
