Општина Гевгелија изврши траен отпис на побарувањата по основ на комунална такса од 1078 фирми во висина од 760 илјади евра или 47 милиони денари. Станува збор за давачка позната како фирмарина која даночните обврзници не ја плаќале со години. На предлог на одделението за даноци и такси, Советот на општина Гевгелија донесе одлука да се избришат овие побарувања бидејки нема како да се наплатат. Или фирмите не постојат или поминал рокот за правна наплата на долгот.
,, Отписот на побарувањата по основ на комунална такса за истакната фирма се врши заради бришење на правните субјекти од евиденцијата на Централиот регистар како и застареност на побарувањата и кон истите не може да се поведе правна постапка за наплата на долгот“, стои во одлуката што ја донесе Советот во која има и листа со фирми кои треба да се избришат од регистарот на даночи обрзници на општината
Комунална такса гевгелиските фирми не плаќале во периодот од 2006 година па се до 2020 година кога со општината раководеле градоначалници од редовите и на СДСМ и на ВМРО ДПМНЕ. На седницата, советниците реагираа дека се отпишуваат побарувања од речиси 760 илјади евра, но биле ставени пред свршен чин бидејки низ годините никој не реагирал.
,, Со овие пари можевме двапати да го вратиме долгот како општина кон Комуналец, да изградиме четири зданиа како ДТВ Партизан и што ли уште не. Според мене ова не е само резултат на несовршена администрација, ова не е само резултат на првите луѓе кои ја воделе општината, ова е аномалија и отсуство на систем. Ова е пораз на државата. Пуштени биле опомени, правени се обиди за присилна наплата а како краен резултат имаме 1078 отписи,, кажа советникот од ВМРО ДПМНЕ Ѓоко Попов
Советникот на Левица Никола Петров побара за овој случај да се вклучи и Јавното обвинителство бидејки како што кажа одредени бизнисмени се богателе на сметка на општината а сето тоа го аминувале градоначалниците од двете најголеми партии.
,, Овие градоначалници не ги превземале сите службени дејствија за да го заштитат Буџетот на општината. Место со овие пари да се градат капитални проекти ние сега ќе правиме отпис. За бизнисмените кои не си ги платиле своите долгови и за градоначалниците кои овозможиле на тие бизнисмени да се стекнат со против правна имотна корист, апелираме и бараме да се вклучи Јавното обвинтелство и еден по еден да ги испита сите случаи ,, кажа советникот Петров
Првиот човек на Гевгелија Андон Сарамандов кажа дека постапиле по препораките на Државниот завод за ревизија. Не сакаше да каже зошто неговите претходници не биле „поупорни“ во наплатата на комуналната такса и дозволувале побарувањата да застарат.
,, Со самото мое доаѓање на функцијата градоначалник, прва работа ми беше да се наплатат сите побарувања што ги има општината. За тие што не беа застарени веднаш покренавме правна постапка за присилна наплата. Не ми божел да коментирам зошто моите претходници дозволиле да се акумулира толкав долг на даночните обврзници,, ни изјави градоначалникот Сарамандов
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
