После Нова година од страна на комуналното претпријатие Комуналец, се очекува испораката на пластични контејнери за селекција на отпадот во Гевгелија откако општината неодамна потпиша Договор за ,,Поставување урбана опрема – контејнери и канти за рециклирање на отпад во градот” со скопската фирма ,,Дема Ин”. Станува збор за Договор со кој во градот Гевгелија треба да бидат доставени 56 пластични контејнери со рамен капак и четри тркала со зафатнина од 1 100 литри но и 2 086 канти за домакинства со зафатнина од 120 литри. Вредноста на набавката изнесува 2 милиони и 780 илјади денари со ДДВ или 45 216 евра.
,, Испораката ќе биде етапно во текот на 2023 година. Контејнерите и кантите ќе бидат со жолта боја кои ќе бидат наменети за отпад кој ќе се рециклира. На тој начин овозможуваме можност за селекција на отпадот во Гевгелија. Набавката доаѓа откако пред два месеци од Пакомак добивме жолти канти за селекција со складирање, хратија, пластика и лименки,, ни изјави градоначалникот Андон Сарамандов.
Средствата за реализација на овој проект се обезбедени од Бирото за регионален рамномерен развој, кој на општина Гевгелија во септември и додели 2 милиони и 800 илјади денари од Програмата за доделување средства за финансирање проекти за развој на урбаните подрачја и одржлив и урбан развој.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
