До крајот на април Гевгелија ќе добие Велосипедска OFF Road патека на која во мај ќе се одржи првиот Гевгелиски Велотлон. Ова е предвидено во рамките на проектот ,,Гевгелија Вело град” што го имплементира АМД ,,Дичо Панов” во рамки на програмата за локална демократија во Западен Балкан 2 – ReLOaD2, која е финансирана од Европската Унија, а ја спроведува Програмата за развој на Обединетите нации (УНДП). Како што не информираше Виктор Гавровски од ова друштво, проектот има за цел да се иницираат здрави животни навики и развивање на спортскиот дух во Гевгелија посебно кај младата популација.
,,Велосипедската OFF Road патека се наоѓа во непосредна близина на Гевгелија, во месноста Долна Корија, спроти Негорските минерални бањи. Просторот изобилува со борова шума и живописни предели што секако беше причина да го одбереме токму овој простор за велосипедската патека која е во близина на Гевгелија, Негорци и Мрзенци и Негорски бањи. Во моментот интензивно се работи на велосипедската патека во должина од околу четири километри. Трасата по која поминува е веќе расчистена од вегетација, на одредени места се интервенира со механизација, а се подготвува и просторот каде ќе бидат поставени препреките,, вели за Дрнка.МК Виктор Гавровски
Освен промоција на велосипедизмот, проектот има за цел и зголемување на економската активност на општина Гевгелија преку туристичко ориентирани услуги кон велосипедизмот и развој на Гевгелија како Friendly bike city општина. Се очекувасо изградбата на патекатада се збогати туристичката понуда преку организирање на спортски настан од натпреварувачки карактер Гевгелиски Велотлон, со тенденција тој во иднина да прерасне во традиција.
,,Очекуваме активностите околу патеката да ги завршиме до крајот на април од причина што во текот на месец мај е предвидено одржување на спортскиот настан од натпреварувачки карактер Гевгелиски Велотлон.Велосипедската патека во иднина ќе можат да ја користат сите граѓани, не само за возење велосипед туку и за пешачење, трчање, како и за рекреирање со совладување препреки,, вели Гавровски
Проектот ,,Гевгелија Вело град” кој е проект за промоција на велосипедизмот и интересите на велосипедистите предвидува одржување неколку работилници со јавната администрација, урбанистичките планери, туристичките работници, работилници по основните училишта и средношколскиот училишен центар. Дополнително, изработен е видео спот за промоција на проектот, издаден е Прирачник за добри практики од областа на велосипедизмот, кој обработува добри практики од земји и градови од Европа, Западен Балкан и Македонија, а за промоција на Гевгелискиот Велотлон се подготвува и анимирано 3Д видео.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
