На Агросаемот во Струмица кој се одржа вчера, организаторот здружението „Проагро фармери“ прогласи и успешни млади земјоделци од нашава земја кои се јавија на распишаниот јавен повик од здружението. За најдобри млади земјоделци беа прогласени Васил Гавровски од струмичко Босилово, Кристина Тодорова од Неготино и Ристе Гоцевски од Моноспитово. Тие од организаторите добија симболични награди во земјоделска опрема но од присутните на саемската манифестација силен аплауз.
21 годишниот Васил Гавровски се занимава и со земјоделие и со сточарство. Обработува 35 хектари земјиште со градинарски и фуражни култури. Поседува 70 пластеници од кои произведува 80 тони пролетна зелка и црвена пиперка . Од сточарството има 50 грла крупен добиток што молзници што за тов и годишно произведува 100 тони кравјо млеко.
Признание и награда доби и Кристина Тодорова од Неготино. Таа има 27 години и е дипломиран земјоделски инженер. Одгледува медицински печурки (буковка, шитаки, реиши, лавовска брада, маитаке) а преработува и локални суровини во продукти. На пазарот исфрли нов продукт ,,гаџун“ кој е спој на гроздов сок и габата Cordyceps sinensis. Позната е и по други иновативни услуги и производи во земјдоелството меѓу кои „мушрони“ тестенини од печурки.
Признание за успешен млад земјоделец доби и Ристе Гоцевски од Моноспитово кој има 26 години.Тој е носител на земјоделско стопанство пет години а наградата ја доби за одличните приноси на зелка, домати, краставици, корнишони и црвена пиперка ова година кое се очекува да надмина 250 тони . (В.Трајков)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
